Shillong Nailur 01: Ka Hynniewtrep National Liberation Council (HNLC) ha ka sngi Thohdieng kala ong ba ka jingtyrwa jong ka Bharatiya Janata Party (BJP) iaka ‘One Nation, One Election’ ka lah ban long tang kum ka atiar ban pynkhlain iaka nongrim Hindutva, kaba pyrshang ban pynlong ia ka ri India ban don hapoh jong ka niam Hindu.
“Ki pyrshang ban wanrah ia ka rukom treikam kaban phaikhmat tang sha kawei ka nongrim, da kaba leh bym suidniew ia ka nongrim jong ka jingdon kiwei pat ki jait Niam ne ban long ki bym iashah ia kano kano ka niam ha ka jingsynshar sorkar. Kane ka jingsngew ka pynmih ia ki jingkylli ha kaba iadei bad ki ‘Fundamental Values’ kiba pynkhlain ia ka Riti Synshar Paidbah ka Ri bad ka jingiada ia ki hok jong ki jaidbynriew rit paid” ong u General Secretary ka HNLC Bah Sainkupar Nongtraw ha ka kyrwoh khubor.
Haba pynpaw ba katei ka jingtyrwa kala pynmih ia ka jingiatai halor ka jingthmu kaba sha lyndet, U Bah Nongtraw ula ong ba ka HNLC ka pynpaw ba kane sienjam ka lah ban pynkylla iaka riti synshar paidbah ka ri sha kata ka ri kaban ialam noh ha ka kyrteng u Blei, da kaba pdiang iaka nongrim jongka Hindutva bad ban thaw iaka Hindu Rastra.
“Ka long kaba kongsan ban ithuh iaka ri India kaba don ia ki jylla bapher, kaba iasyriem kum ka ri America, kaba kynthup ia jylla kiba leit pyniasoh laitluid bad ka ri bad katto katne lyngba ka jingpyni da ka bor. Katei ka Article ka thmu ban pyni ia ka jingshai halor ka jingsngewkhia kaba la kdew da kiba bun ki seng sain pyrthei, ki sengbhalang bad ki riewshimet kiba sngewkhia ia kaei kaban ktah iaka ri India ha kaba iadei bad ka synshar khaddar bad ka nongrim jong ka synshar paidbah” ula ong.
U Bah Nongtraw ula ong, ba ka jingtyrwa ban don ia ka elekshon kaba ryntih kaba la tip kum kawei ka Ri bad kawei ka elekshon, kala pynphaikhmat ia baroh ia ka jingktah jinglong kyrpang jong ka ri India ha ka kam sain pyrthei.
“La pynpaw ia ki jingsngewkhia ba kane ka rukom treikam kan lam sha ka jingpynwan shi jaka iaka bor, kan pynduna iaka jingmihkhmat bad jingdonbynta jong k iseng riewlum bad iaka sur jong ki ritpaid. Kane kan ktah kylla iaka jingmih ryntih ki paidbah ha kaban iashimbynta ha ki kam elekshon. Ki nongiasaid ain kila pynpaw ba ka Ri kaba iar kum ka India ka donkam iaka rukom treikam kaba paka ha ka kam synshar jongka sorkar ban pynthikna ba kan don ka jingmihkhmat ryntih ha baroh ki thain bad ki jaidbynriew” ula pynpaw.
Nalor kane, u Nongialam ka HNLC ban pyni ba katei ka jingtyrwa kan ktah jur bha, ka long kaba kongsan ban phaikhmat sha ka bynta ba la thaw ia ka ri India. I aka India ym shim la batai da ka jingdon jong kaNiam hynrei la batai shai ba kadei lyngba ka jingdon jong ki jylla (kumba la kdew ha ka Article 1 jongka Indian Constitution) bad ka histori jong ki ‘Princely States’ kiba lawan ban pyniasoh laitluid. Hynrei dei ruh ban phaikhmat sha ka bynta ba ki don pat ki jylla namar ba la shu pyndonkam da ka bor bad la pynbor ia ki ban soi jubor ia ka Instrument of Accession. Da kaba ithuh ia kine ki jingjia katkum ka histori, ka long kaba kongsan bha ban peit iaka jingshongaiñ ban pyntreikam iaka Uniform Election System ne ka elekshon kaba ryntih hapoh ka ri India kaba ka kam sain pyrthei ka don iaka jingiapher ha baroh ki liang.
Ula ong ba ka jingthmu jongka sorkar BJP iaka ‘one nation, one election’ kadei ban da iatai shwa namar bun ki jingpynsngew kila mih namar ba kan ktah iaka rukom synshar paidbah ha ka ri bad iaka jingdon ia ki seng sain pyrthei ki bapher bapher.
Ka long kaba sngewkhia bha ban pynwan shi jaka noh tang ia kawei ka bor synshar bad ban pynduna iaka jingmihkhmat jong ki seng riewlum bad ia ka sur jong ki ritpaid.
“Na ka liang jong ka HNLC, ngi sngew ba ka jingthmu ban kyntiew ia kawei ka nongrim bad ban thaw iaka Hindu Rastra kan pynduhjait iaka jingburom ia baroh ki niam bad iaka jinglong bym shah liang ia kano kano ka niam ha ka jingsynshar ka sorkar. Kumta haba ia kane ka jingtyrwa ka dang don hapoh ka jingiatai nia, ka long kaba donkam ban phaikhmat sha baroh ki liang bad ban pynthikna ba kano kano ka jingkylla ha kaba iadei bad ka rukom pyniaid elekshon ha ka ri kadei ban iaid ryngkat bad ka nongrim jong ka jingsynshar paidbah bad ban mihkhmat naka bynta ka bha ka miat jong baroh ki nongshong shnong” la pynkut u Bah Sainkupar Nongtraw.
