Shillong, Lber 23 : Ka Hynniewtrep National Liberation Council (HNLC) ha ka sngi U Blei, kala kynthoh ba ka rai ba dang shen jong ka Unlawful Activities (Prevention) Tribunal ban khang ia u nongiasaid Ain ka Seng Bah Fernando Shangpliang ba un ujor ia ka show cause na ka bynta ka seng ka pyni sha ka pyrthei ia ka jingthmu sain pyrthei ba paw pyllein pyllein jong ka Sorkar India bad ka Sorkar ha Meghalaya.
Ha ka kyrwoh, u General Secretary-cum-Publicity Secretary ka HNLC Bah Sainkupar Nongtraw ula ong ba ka HNLC, ha ka rukom treikam kaba dei hok bad lynti jong ka synshar paidbah, kala pyrshang ban tynjuh ia ka jingniew beain ia ka seng kum ka “seng beain”.
“Hynrei, wat hapdeng ka jingbud ia ki kyndon ain, ka bor treikam kaba kam ban bat ia ka hok kala shah pyndon kam kum ka atiar ban pynsngap jar ia ka jingialeh jong ngi. Ka jingkyntait ka Tribunal ban pdiang ia u nongiasaid ain jong ngi kam iapher bad ka jingleh khnang ban kyntait ia ka sur ba dei hok jong ki Hynniewtrep ha kane ka riti synshar paidbah. Kam don satia ka jingleh hok ia ngi katba ngi dang hap hapoh ka lama ka ri India” kala ong.
“Ki jingleh jong ka Tribunal ka dei ka jingpynkhein bakla ia ka lynti jong ka Ain kumba la pruid dak ha ka rukom pyniaid ia ka bishar khadar hapoh ka ri India. Ka iuhroit ia ka nongrim bala pdiang da ka pyrthei halor ka jingbishar kaba hok, ka pynkylla kamkai ia ka jingbishar ba leh hok kaba iasyriem kum ka Kangaroo Court ha kaba ia ka hukum la lah ban batai lypa. Kum kane ka jingleh ka pynpaw pyrthei ba ka Tribunal kam dei kaei kaei ruh hynrei ka atiar sain pyrthei bala pyndonkam ban pynduhjait ia kino kino ki jingialeh pyrshah ia ka jingsynshar ka India ha bri Hynniewtrep” ong u Bah Nongtraw.
Haba pynpaw ba ka Sorkar India bad ka Sorkar Jylla Meghalaya kila dep ban aiti iala ki jong ki affidavit, une u Nongialam ka HNLC ula ong “Hynrei, haba ka HNLC ka pyrshang ban jubab da ka lynti ka ain, la pakhang pynban ia ka lynti iaid jong ka. Kane ka sienjam ka pynpaw ia ka jinglong arsap jongka Ri India, kaba ialap ia ka synshar paidbah hynrei leh pat kum leh donbor kum ka Sorkar Bilat (colonial). Ka pynshisha sa shisien ba ki jingthmu jong ka Sorkar ka long ban bteng ka jingbat jubab ia ka bri Hynniewtrep, ha ka jaka ban iaid ha ka jingbishar kabym shah liang”.
 ha ka sngi U Blei, kala kynthoh ba ka rai ba dang shen jong ka Unlawful Activities (Prevention) Tribunal ban khang ia u nongiasaid Ain ka Seng Bah Fernando Shangpliang ba un ujor ia ka show cause na ka bynta ka seng ka pyni sha ka pyrthei ia ka jingthmu sain pyrthei ba paw pyllein pyllein jong ka Sorkar India bad ka Sorkar ha Meghalaya.){kind=link}