Guwahati, K’lyngkot 15 :Ka kynrum kynram ka la mih ha Assam hadien ba la shim ia u Ismail Siddique, ia uba la tip bha kum u Bagh Hazarika tang kum ka khana puriskam da u Myntri Rangbah (CM) ka jylla u Himanta Biswa Sarma.
U Ismail Siddique ia uba la tip bha kum u Bagh Hazarika u dei u riewialeh ba shlur jong ki shipai Ahom ha ka spah snem kaba 17 kiba la iakhun pyrshah ia ki Mughal ha ryngkat u Lachit Barphukan ha ka thma ba pawkhmat ba la tip kum ka Saraighat.
U Bagh Hazarika la ngeit ba u dei u nongialam ba ar jong ki Ahom, kata hapoh jong u general Lachit Barphukan ha ka thma Saraighat.
U Himanta Biswa Sarma haba ai jingkren ha ka state convention jong ka Akhil Bharatiya Vidyarthi Parishad (ABVP) ha Guwahati, u la ong ba u Bagh Hazarika u dei tang ka khana puriskam bad kam don ka jingshisha.Ula ong ruh ba kam shym la don kano kano ka jingtip ba thikna ha kaba iadei bad u Bagh Hazarika hapoh ki kot histori. “Ki nonghikai histori jong ngi kim pat ju kylli shaphang jong u,” ong u CM Sarma.
Da kaba kynthoh tyngeh ia u CM halor kane ka jingkren pyrshah ia u Bagh Hazarika, kiba bun ki riew shemphang bad ki nongthoh kot Muslim ba pawkhmat ka Assam kila kyntait ia kane ka jingialam bakla jong u CM ha kaba iadei bad ka histori.
“Ngi kyntait ia ka jingpynsngewthuh bakla jong u CM ka Assam ha kaba iadei bad ka histori jong uwei na ki khun ba pawkhmat ka Assam lyngba ka mat jong ka jingiapher niam,” ong ka jingthoh ba la pyllait da ki shiphew ngut ki riew shemphang Muslim ka Assam.
“Lada ka dang don kano kano ka jingartatien ha kaba iadei bad u Bagh Hazarika, ka sorkar ka dei ban thaw ia ka committee jong ki nongthoh histori hapoh ka university jong ka Assam ban lap la u don shisha ne em,” pynpaw katei ka kynhun.
Kine ki shiphew ngut ki professor kiba la kynthoh pyrshah ia u CM ka Assam ki kynthup ia u Abu Nasser Syed Ahmed bad u Poynuruddin Ahmed, u Myntri sorkar barim u Samsul Huda, u riew shemphang kam sain hima u Mehdi Alam Bora, u Kazi Nekib Ahmed bad u Mushtaq Golam Osmani na ka Bagh Hazarika Research Forum.
