Agartala, Naiwieng 08 :Hato ka Tripura kala kylla long ka nongbah jong ki kam leh beijot ne ka ‘rape capital’ jong ka thain shatei lammihngi (Northeast)? Hooid, jan baroh ki party liang pyrshah ha Tripura ki ngeit ba kane ka jylla ka thain Northeast kala kylla long ka ‘rape capital’ jong ka thain hapoh ka jingsynshar jong ka BJP.
Haduh kumba 407 tylli ki jingjia shah leh beijot la rejistar hapoh Tripura naduh u bnai Kyllalyngkot 2020.Katkum ka tnat kam pohiing ka jylla, napdeng ki 2,164 tylli ki case kam pyntriem pyrshah ia ki kynthei ba la rejistar ha kine ki 2 snem shiteng ba la dep ha Tripura, haduh 381 tylli ki dei ki case kam leh beijot bad 26 tylli ki kam leh beijot kynhun ne gang rapes.
Kumba hynniew tylli ki jingjia shah leh beijot kila jia tang hapoh ki shiphew snem ha u bnai Risaw ba la dep, ki jingjia kiba la wanrah ka jingkhih bitar hapoh ka jylla.
Ka jingshah leh beijot jong kawei ka khynnah kaba dang khie samla ha Unakoti district kaba la jia ha ka 19 tarik u Risaw ba la dep kala wanrah ki jingiakhih pyrshah da ki party liang pyrshah kiba la kynnoh ruh ia ka jingdonkti jong u khun u Myntri ka tnat Labour ka jylla halor kane ka kam leh beijot.
Da kaba pynpaw ka jingsngewkhia kaba jur halor ka jingkiew jong ki kam leh beijot bad kiwei pat ki kam pyntriem pyrshah ia ki kynthei, na ka liang u Myntri Rangbah (CM) barim ka Tripura u Manik Sarkar ula ong; “Ki kam pyntriem pyrshah ia ki kynthei ha Tripura kila kiew arsut hadien ba ka BJP kala wan ha ka bor.Ka long ka jinglehrain kaba khraw ia ka sorkar.”
“Ka sorkar kala dei ban shim ia ki lad jingiada ban tehlakam ia kane ka jingkiew arsut jong ki kam pyntriem pyrshah ia ki kynthei.Hynrei Nga sngew bynniaw ban ong ba na ka liang u myntri rangbah ka jylla um shym la kren ei ei ruh ha kaba iadei bad kine ki jingjia kiba la jia ha kine ki khyndiat sngi ba la dep.Wat u DGP ruh ula sngap jar jar. Ki riew pyntriem ba shisha kiba donkti ha kine ki kam leh beijot kim shym la shah kem.Ki pulit kim shym la shim ia ki lad jingpynshitom pyrshah ia ki runar kiba donkti namar ki don ia ka jingkyrshan da ki nongialam sain hima sima,” ong une u nongialam ba la rim ka CPI-M lyngba ka lad pathai khubor.
Da kaba kynthoh pyrshah ia ka sorkar BJP, u MLA ka Congress u Sudip Roy Barman ula ong ba ka Tripura kala kylla long ka ‘rape capital’ jong ka ri.
“Lada phi leit sha ka NCB report, haduh mynta phi shem ba ki kam pyntriem pyrshah ia ki kynthei ki wanrah da shisha ka jingsngewkhia kaba jur, ka Tripura ka dei kaba la wan shakhmat eh hapoh ka ri.
