Shillong, Naiwieng 15 : Ka Hynniewtrep National Liberation Council (HNLC) ka la kynnoh ba ka jingkhot iakren iasuk jong ka sorkar ka dei tang ka buit kaba la buh jingkheiñ lypa ban lah pynjem khnap bad pyntroin ïa ka jingïaleh jong ka seng.
“Ka jingkhot iakren iasuk jong phi kam dei ei ei hynrei ka jingleh kaba la khein lypa khnang ban ioh jingmyntoi ialade, ym ka jingmyntoi ia ka Jaidbynriew jong ngi. Ka jingthmu ba shisha ha lyndet jong kane ka jingleh ka long ban pyntlot, pynduh mynsiem, ban rung khlieh bad pyniaid ia ngi— ban pyntroin ia ka jingkhih jong ngi haba ak kumba wad jingsuk. Kane kam dei shaphang ka jingpyniasuk kaba shisha hynrei ka dei ka jingthmu ban pynduhjait ia ngi bad ban pyntroin ia ka jingialeh jong ngi”, ong u General Secretary cum Publicity Secretary ka HNLC Bah Sainkupar Nongtraw ha ka kyrwoh.
Kane ka jingkynthoh kala mih tang shisngi hadien ba ka Sorkar Pdeng kala rai ban pynjlan biang ia ka jingkhein ia ka HNLC kum ka kynhun beain sa 5 snem kynthih.
U Bah Sainkular ula ong ba ka HNLC kam sngew phylla satia ia kane ka rai jong ka Sorkar ban pynhap biang sa shisien ia ka jingkhein beain ia ka HNLC hapoh ka Unlawful Activities (Prevention) Act, 1967.
“Kane ka jingleh ka pyni ia ka jingiai iuhroit ia ka jingpynpaw pyrthei ia ka jingiakhih ba dei hok jong ngi bad ka jingpynthut ia ka jingialeh jong ngi ban ioh ia ka jingsynshar hi dalade,” u la bynrap.
Nalor kane, une u nongïalam jong ka HNLC u la ong, “Ka jingïathuh khana ba la pynphriang da ka tnad kam pohïing jong phi, kaba pyni ïa ka HNLC kum ka “kynhun bala tlot bor” kaba don tang 10-15 ngut ki dkhot kiba treikam, ka pynpaw ïa ka jingkhein troin kaba khraw ïa ka bor jong ngi . Hynrei ki jingthoh jong phi hi ki pynpaw ba kane ka jingïathuh khana ka long kaba ïalam bakla, ha kaba 73 ngut ki dkhot jong ka HNLC ki la shah kem haduh mynta bad ka jingdon ki dkhot ka dang ïai bteng ban kiew.”
“Shuh shuh, ka jingshisha ba tang lai ngut ki dkhot ki la pyndem noh ha kine ki san snem ba la dep, ka pyni ïa ka jingsatar jong ka HNLC bad ka jingïaishah ha ka jingialeh” u la ong.
