Tinsukia, Nailur 24 : Namar ka jingsaphriang ki khubor ka jingshah rahbor ki khynnah ha Tinsukia district ka Assam, kata hadien ba ki don ki katto katne ngut ki khynnah kiba jah rngai na ka district, na ka liang u Superintendent of Police ka Tinsukia, u Debojit Deori ula pynpaw ha ka jingialang bad ki lad pathai khubor hynnin ka sngi Thohdieng ba ki don laingut ki khynnah, kata arngut na Bordumsa bad uwei na Digboi kiba la jah rngai noh ha ka sngi Balang ba la lah hynrei ia kiba la ioh ban pyllait bad don mynta ha kti jong ki pulit ka tnat Railway ka Maligaon.
Da kaba kyntait halor kitei ki khubor hamsaia, u Deori ula ong ba ki don ki briew ki bym lah ban ithuh kiba la shu ngat eh ha ka jingshah bom shnong tang namar ka jingshah kynnoh nong rahbor khynnah.
“Ia kiba kum kine ki jingjia dei ban pynrem jur bad ngi la lapdien ruh ia ki riew shim kabu kiba donkti ha kaba pynphriang ia kiba kum kine ki khubor hamsaia, bad ngin shim ka jingpynshitom pyrshah ia ki,” ong u SP.
Nalor kata ula pynshai ruh ba kim don satia kita ki nong rahbor khynnah hapoh Tinsukia district bad ha ki district ba marjan kumjuh.Ha kajuh ka por u kyrpad ruh ia ki lad pathai khubor ba kin pynthikna bad pynshisha ha kaba iadei bad kiba kum kine ki mat kiba buh jingma hashwa ban pynmih ia ki khubor.
