Shillong, Jylliew 17 : U Myntri ka Tnad Pule Puthi bad Nongialam ka NPP Rakkam A Sangma, ula kyntait war ia ka jingkynnoh ba u kynthoh kynshoit pher Jaidbynriew ha ka por ba ialap elekshon Lok Sabha ha Ri-lum Garo.
Kane kala mih shisngi hadien ba ka Voice of the People Party (VPP) kala rai ban ujor da ka ejahar (FIR) pyrshah ia u Myntri halor ka jingkynnoh ba u kynshoit ban mih ka jingsngew iapher hapdeng ki Khasi bad ki Garo.
Kane ka rai jong ka VPP ka dei kaba la pynshong nongrim na ka Video jong u Myntri, kaba la saphriang ha ki rynsan social media, katba u dang kren ha ka jingialang paidbah da ka ktien Garp ha ka por ialap elekshon.
Hynrei ka VPP kala pynpaw pat ba kam lah ban pynthikna bha ia ka video jong u Myntri, ha kaba ula ong ba ki A’chik kin sa shah pynduh pyndam lada ka VPP ka wan ha ka bor ha Meghalaya.
Haba iakren, u Rakkam A Sangma ula ong “ Nga kyrmen ba ki (VPP) ioh ia ka video ba pura bad ka jingpynkylla ktien kaba dei (ia ka jingkren jong nga).
“Nga khlem kren bakla eiei ruh em, hynrei ban pynkut ia ka jingleh politics phiah bad sngew iapher jaidbynriew jong ka VPP da kaba iatylli lang na ka bynta ka kong Ampareen (Kyrtong) iakhun MP na Shillong” ula bynrap.
U Myntri ula ong ruh ba ka VPP kala dei ban mudui ia ka jingujor hakhmat u Returning Officer ha ka por elekshon hynrei mynta ka elekshon kala kut.
“Namar kata, ka long kaba kongsan ban nang bad sngewthuh ia ki ktien jong kiwei ruh” ula bynrap.
U Nongaiktien ka VPP Batskhem Myrboh ula ong ba ka party kala rai ban ujor da ka ejahar pyrshah ia u Myntri bad kyrpad ia ka Tnad Pulit ba kan tohkit laitluid ia kane ka kam khlem ka jingtieng ne shah liang.
Ula ong ba lada la lah ban pynshisha ba ula kren ia kitei ki kyntien, u Rakkam u dei ban hiar shuki noh bad shim ia ka jingkitkhlieh namar ka jingbet ia u symbai sngew iapher jaidbynriew hapoh ka Jylla.
 kala rai ban ujor da ka ejahar (FIR) pyrshah ia u Myntri halor ka jingkynnoh ba u kynshoit ban mih ka jingsngew iapher hapdeng ki Khasi bad ki Garo.){kind=link}