Shillong, Jymmang 10 : Haba pynkut noh ia baroh ki jingiamutdur, u Nongialam ka AITC bad Myntri Rangbah barim Dr Mukul Sangma hynne ka sngi Balang, ula kyntait ba kala don ka jingiakren bad u Nongialam ka BJP bad Myntri Sorkar Bah A.L.Hek halor ka jingthmu pyniasoh noh ki MLA ka AITC sha ka BJP.
U Dr Mukul ula phla ruh ba u Bah Hek u dei uba la kyrpad ia ki Nongialam ka AITC ban pynthikna ba ka Sorkar MDA ba ialam da ka NPP kan nym wan phai biang sha ka bor synshar hapoh ka Jylla.
Kane kala mih hadien ba u Bah Hek ula kam ba ula iashong dihsha bad ki Nongialam ka AITC bad iakren ruh halor ka jing wan pyniasoh noh sha ka BJP.
Haba iakren bad ki nongthoh khubor, u Dr Mukul u la iathuh ba ula iashong dih sha bad u Bah Hek ha ka 3 tarik u Lber, shisngi hadien ba pynbna ia ka result jong ka elekshon 2023.
“U Bah AL Hek u dei u paralok ba iajan bha jong nga. Ngi la iatreilang la slem bha. Ula don ha Congress katba ngi dang don ha ka Congress. Ula don ha ka kynhun Myntri ha ka por ba nga long Myntri Rangbah ka Jylla. Phi la iohi ia ka jingiatreilang jong ngi bad kaba sngewtynnad ka long ba u kwah ban iakynduh ia nga ha ka step 3 tarik Lber, ngi la iadih sha bad ia aikhublei mar kylliang hynrei ula hap mih kyrkieh noh namar ba u hap leit jingialang tangba kawei ula ong ha nga ba um sngewtynnad bad ka result jong ka elekshon namar ba ka BJP kala ialeh katba lah ban iohi ia ka jingjop bun tylli ki seat” ula ong.
“Kane ka dei ka por ba nga iakynduh ia u (Hek) hynrei u khlem ong ba ngan rung noh sha ka BJP sha kano kano ka kam. Hynrei ula ong ba sngewbha leh eiei ban pynthikna ba kane ka Sorkar (MDA) kan nym wan phai shuh” ong u Dr Mukul haba bynrap “Bad nga la ong ba ngi la leh ia kata bad phi la iohi ha ka 3 tarik Lber ngi la pyrshang ban ialum lang, hynrei kam shym la seisoh watla baroh ki dkhot jong ki seng sain pyrthei kila ialum lang shijaka”.
Ha kawei ka liang, u Myntri Rangbah barim ula ong ba u don ka daw ban ngeit ba kane ka khana shaphang jong u bad ka jingiasoh jong ka party (AITC) bad ka BJP ka dei kaba don jingiadei bad ka elekshon ha Sohiong Constituency.
