Shillong, Nailur 23 : U Symbud Myntri Rangbah Bah Sniawbhalang Dhar ula kyntait ia ka jingkynnoh ba jied bahaiing lajong ha ka jingbujli Myntri ba dang shen jong ka Sorkar Meghalaya Democratic Alliance-II.
“Kane ka dei ka kam iing jong ka NPP, balei ba ngan kren hakhmat jong phi” ula ong haba iakren bad ki nongthoh khubor ha ka sngi Ba-ar.
Kane ka jingkren u Bah Sniawbha kala mih hadien ki jingkynthoh pyrshah halor ka jingpynrung iala u Kynum bad MLA ka Jowai Bah Wailadmiki Shylla ha ka kynhun Myntri.
Haba iadei bad ka jingpynkynriah ia ki dukan madan ha Shillong, u Bah Sniawbha u pyntip ba kane ka dei ka kam kaba iaid man ka sngi, bad ka jingpynkynriah ka dang sahteng ha Laitumkhrah, GS Road bad marjan ka Civil Hospital.
U Symbud Myntri Rangbah ula pyntip ba ki jingpyrshang kila iaid shakhmat ban leh eiei halor kane ka kam.
Halor ka jingpynkynriah ia ka Them Metor na Them Iew Mawlong, u Bah Sniawbha ula ong ba ka jing iakren ka dang iaid haduh mynta bad ym pat lah satia ban shim ia ka rai ba khatduh.
“Kane ka kam ka dang sahteng ha ka jingbishar ka Iingkashari. Kane ka dei kawei na ki daw, kam iahap satia ia nga ban kren eiei hynrei ngin sa iapeit ia kaei kaban jia”ula bynrap.
Haba kylli halor ka jingkylli ban thied ia ka jaka shipai na ka bynta ban pynkynriah ia ki 342 tylli ki Longiing ka Them Metor, u Bah Sniawbha ula ong ba ia kane ka kam ym pat iakren satia bad un sa iakren ia ka ha ka por kaba biang.
