Shillong, Jymmang 11 : U Symbud Myntri Rangbah ba khmih ia ka Tnad Urban Affairs Bah Sniawbhalang Dhar ha ka sngi U Blei ula kyntait war ia ka jingkynnoh ba dang shen jong ka seng Hynniewtrep National Liberation Council (HNLC) ba u bei tyngka ia ka Seng ha ka por ba u long Myntri hapoh ka Sorkar ba ialam da ka Congress bad kynthoh ba kadei ka dei tangka “buit Politics” ban pynthohbria ia u.
“Sngewsih, ban gam shym la don ha Jylla la katto katne taiew. Ka jingkynnoh jong ka HNLC ka dei kaba shu thok bad ba khlem nongrim. (Kumjuh ruh) na ki jingkynthoh jong kiwei ki nongialam sain pyrthei, la I pynban ba ka dei tang ka buit politics tang ban pynthohbria ia nga” ong u Bah Sniawbha haba iakren bad ki nongthoh khubor.
“Sngewbha kynmaw, katba ki dang kwah ban pynphriang khubor sniew pyrshah ia nga, u Blei un nang kyrkhu ia nga, ia ka party jong nga bad ia ka Sorkar namar nga don hangne ban shakri naduh ka mynsiem ia ki paidbah. Ngi don hangne ban iada ia ki paidbah, ka Jylla bad ka Ri baroh kawei. Ngi dei ki nongialam jong phi, sngewbha shaniah ia ngi namar baroh kine ki dei ki jingkynnoh ba khlem nongrim” ula bynrap.
Halor ka jingdawa ka Liang Pyrshah-ka Indian National Congress bad ka Voice of the People Party (VPP) ban weng noh ia u na ka shuki DyCM ban plie lynti ia ka jingtohkit halor kane ka jingkynnoh, u Bah Sniawbha ula ong ba um pat long satia uba kloi ban iehnoh ia ka shuki Symbud Myntri Rangbah ka Jylla namar ka jingkynnoh jong ka kynhun bala khein be-ain ka dei ka bym don nongrim.
“Kane ka dei ka jingdawa na ki seng sain pyrthei ba don ha ka Liang Pyrshah. Ka dei ka kamram jong ki ban dawa ia ka jingiehnohkam bad weng ia nga na ka shuki bad kiei kiei kiba phileh ki donkam ban don ia ki sakhi ba pura. Shu khein ba lada nga iehnohkam kan mut ba nga pdiang ia ka jingkynnoh, ia kaba ngam leh satia bad ngam khuslai eiei ruh em namar nga don hangne ban shakri ia ki paidbah jong nga ym ban shakri ia ki lehnoh, sngewbha kynmaw ia kane. Kane ka dei ka jingkut jingmut jong nga. 17 snem kum u MLA hala ka jong ka Jylla. Nga ieid ia ki briew lajong. Ngan aiti bad pyni nuksa ban nang trei shitom shuh shuh na ka bynta ki paidbah ka Jylla” ula bynrap.
Haba kylli la un shim ia kano kano ka sienjam kat kum ka ain da kaba ujor ejahar, u Symbud Myntri Rangbah ula ong “Ngan sa peit namar haba pyrkhat, ngam tip mano ba don ha lyntdet bad lehse lada nga shem mano ba don ha lyndet, nga lah ban hap leh ia kata”.
“Ngin sa iapeit ia kaei kaba dei ban leh. Phi tip bha ba ka dei ka seng bala khein be-ain. Phi tip bha ia ka jingpynphriang ia ki khubor thok manla ka por. Ngi hap ban peit bha la ka dei ka kam kaba khia ne em, ngin sa iapeit hynrei ka dei ka dei ka jingkynnoh ba khlem nongrim bad baroh ki long kiba bakla” ula ong.
 ba u bei tyngka ia ka Seng ha ka por ba u long Myntri hapoh ka Sorkar ba ialam da ka Congress bad kynthoh ba kadei ka dei tangka “buit Politics” ban pynthohbria ia u.){kind=link}