Shillong, Rymphang 18 : U Kyrtong ka United Democratic Party (UDP) na North Shillong Dr Aman War uba dei ruh u Director ka Health Service (MI) bala shongthait, hynne ka sngi saitjain ula kren da kab shai kdar ba kam don satia kata ka jingpyndonkam bakla ia ka song pisa bala mang ban iakhun ia ka khlam Covid-19.
“Phim lah ban pyndonkam bakla ia ka song pisa jong ka Sorkar Pdeng” ong u Dr Aman haba kren ha ka rynsan ialap elekshon jong baroh ki kyrtong (Common Platform) bala pynlong hynne ka sngi saitjain da ka Shnong Wahiingdoh.
Une u DHS(MI) barim ula pyntip ba ka jingiarap da ka song pisa ba T.50000 (sha kiba khlad Covid) ka dei kaba wan na ka Sorkar Jylla namar ka long kaba shitom ia ki briew ban ioh ia ka T. 4 lak bala ai da ka Sorkar Pdeng namar ka jingjrong palat ka kam ba hap ban pyndep.
Ula ong ba ka DHS(MI) kaba dei kawei na ki lai tylli ki shnat ka Tnad ka Koit ka Khiah, kala ai da ka jingthoh ba la pynlut haduh T. 248 klur ha ka jingiakhun ia ka khlam. “Kiba bun na ki jingpynlut ka dei ha ka jingsiew tulop ia ki nongtrei contract” ula bynrap.
Haba kular ban rat dyngkhong ia u droks, u Dr Aman ula ong ba ka party (UDP) kan trei shitom bha ha kaban pynthikna ba ki samla trai muluk ka Jylla kin ioh kam 100% ha ki tnad ka Sorkar Pdeng bad ki Kompani kiba treikam hapoh ka Jylla.
Ula ban jur ruh halor ka jingdonkam ban pynjynsur shuh shuh ia ka rta bad ong ba ka jingpynkha ia ki kam ba lait ka dei ban long kat kum ka jingdon pisa jong ka Jylla.
Halor ka pule ka dangle, une u kyrtong ka UDP ula ong ba ka long kaba donkam ban don tang kawei ka jingsiew (single fee) ia baroh ki sobjek ba kynthup ia ka computer science ha ki skhim bad ban pynbha ia ka grant sha ki skul adhoc, ka baibam ia ki nonghikai bad ban ai noh ka jingithuh kat kum ka hok jong ki.
U Dr Aman ula pynpaw ruh ia ka jingsngewkhia ba ki kot skul bala pyndonkam ha Jylla ki dei kiba la pyniaid kat kum ka mon ki nongthoh kot (publisher based) bad ong ba ka jingbujli ia ki kot sla man ka por kala ktah jur bha ia ki longiing kiba duk bad ba duna ka jingioh.
“Lada ka KSU ka lah ban bei tyngka ia 4 ngut ki samla ban iakhun IAS, ngi dei ban lah bei ia 10 ngut lane tam lada ngi wan ha ka bor” ula ong.
U Dr War ula ban jur ruh halor ka jingdonkam ban wanrah ia ka Reservation Policy kaba shisha (real) ka ban mynjur da ka Iingdorbar Thaw Ain ka Jylla. Ula maham ruh ba kan nang pynkha ia ki jingeh lada ki briew ki shu iaktaid palat halor kane ka Reservation Policy ba mynta namar ka dang dei tang ka “Notification”.
Une u DHS(MI) barim ula ther tyngeh ruh ia ka Sorkar MDA halor ka jingpynpra ia ka stadium ha Polo bad ka Indoor stadium ha Lachumiere khlem da pyrshah ia ka bha ka miat jong ki Nongialehkai hapoh ka Jylla bad ong “Kam shym la don satia jingpyrkhat sani halor kane ka kam”.
Kat kum ka jingong jong u, ka long kaba donkam ban don ki jaka ai jinghikai ia ki samla khnang ba kin lah ban pynlong ia ka kam ialehkai kum ka lad ban kamai jakpoh.
