Shillong, Rymphang 18 : U National President ka National People’s Party (NPP) bad Myntri Rangbah ka Jylla Conrad K Sangma ula kyntait ia ki jingkynnoh bamsap jong u Myntri kam Pohiing ka Ri bad Nongialam ka BJP Amit Shah lem bad ki Liang Pyrshah (AITC) pyrshah ia ka Sorkar MDA ba ialam da ka NPP bad kob ruh ba baroh kiba kynnoh bamsap ki lahban pan da ka RTI ban lap ia ka jingshisha.
U Conrad ula ong da ka jingsngewskhem ba baroh ki jingtip jong kine ki kam ba shah kynnoh bamsap kila don ha ki rynsan paidbah.
Haba jubab ia ka jingkam u Myntri kam Pohiing ka Ri Amit Shah ba ka Meghalaya ka dei kawei na ki Jylla ba jur bamsap duh hapoh ka Ri, u Conrad ula ong ba ka BJP kala leh ia kane tang ha ka jingialap elekshon bad kala pynmih ruh ia kum kine ki jingkynnoh ha ka elekshon ha West Bengal bad ha Telangana.
Ula pynpaw ia ka jingsngewskhem ba ka party (NPP) kan long kaba jop bun eh ki MLA ha kane ka elekshon ban wan.
U Conrad ula kyntait ruh ia ka jingkynnoh ba ki nongkyrshan ka NPP ki dei kiba donkti ha kaban thaw ia ki jingkulmar haba kubur ba ki lah ban don kawei ne artylli ki jingjia kiba la jia hynrei kine ki dei kiba jia tang ha ki shnong ki thaw hynrei kham niar eh ban jia.
“Kine ki jingjia kim dei kiba leh da ka NPP. Ki jingiatakhuh bad kulmar kan mih beit hynrei ban shu ong ba ki Nongtrei ka NPP ki dei kiba pynkulmar ban ba jrong kti ka long ka bym dei satia. Ngi ieng ha ka jingsuk bad jingshngain bad ngi la pynthikna ba ki nongtrei jong ngi kin ym leh ia kano kano ka kam kabym dei” ong u Conrad.
Dang shen, kila mih artylli ki jingkulmar hapoh ka Phulbari Constituency ha kaba ki Nongtrei ka AITC kila thombor ia ki Nongtrei jong ka NPP.
