Shillong, Rymphang 20 : U National President ka National People’s Party (NPP) Conrad K Sangma ula kyntait ia ka jingkynnoh jong ka BJP halor ka jingdon bynta jong u halor ka jingkyntait ki bor Disrtrict ka West Garo Hills ban ai jingbit ia ka BJP ba kan pynlong ia ka rally elekshon ha PA Sangma Sports Complex, Tura, ka ban wan iashimbynta da u Myntri Rangbah Duh ka Ri, u Narendra Modi.
Haba pynpaw ba um don bynta eiei ruh em halor ka jingkyntait ban ai jingbit ia ka rally u Myntri Rangbah Duh, ula ong ba ia ki jingbit ban pynlong ia baroh ki rally la ai da ka Election Commission of India (ECI) bad ka bor District kala shu pyn treikam ia ki jingbthah jong ka ECI.
“Baroh ki jingbit ki wan na ka liang ka Election Commission of India bad haba pynshong nongrim kat kum ki jingbthah, ka bor District kala leh ia kata. Namar kata, ka NPP ne mano manor uh kim lah ban ong eiei. Ban shu kynnoh ia ka NPP bad ka kyrteng jong nga ka dei kaba bakla palat. Wat nga ruh nga khlem ioh ban pynlong ia bun tylli ki rally jong nga” ong u Conrad hynne ka sngi nyngkong.
U Conrad ula ong ba kum kine ki kam ki ju jia ha ka por elekshon hynrei ka BJP kala shu pynheh ia kane ka ishu. “Hynrei ngi la de pong naduh kaba sdang ba ka stadium ka don arbynta. Ka bynta ba nyngkong ka kynthup ia ka football stadium kaba la dep ban plie.
Kawei pat, ka dei ka Indoor Stadium bad ka Swimming Pool, ka bym pat dep bad ngi la dep kren shai ia kane. Ka kam ka dang dep tang shiteng bad kawei pat ka bynta kam pat dep satia” ong u Myntri Rangbah.
Lah ban kdew hangne ba ka Sorkar Jylla hapoh ka jingialam jong u Conrad K Sangma, kala plie paidbah ia ka Football Stadium ha ka PA Sangma Sports Complex, Tura, West Garo Hills ha ka 16 tarik Nohprah 2022. Kane ka madan ialehkai ka dei ka madan ba nyngkong eh ha Jylla kaba long kat kum ka International standard.
Halor ki daw kiba lah ban long halor ka jingbym ioh jingbit ban pynlong rally, u Conrad ula ong “Ka dei ka jingshisha ba haba u PM Modi u pynlong ia ki prokram, ki paidbah kin wan bun bha. Namar kata, nga sngew ba ki bor District ki lah ban sngew ba ka dei ka natural turf (phlang shisha), bad lada wan bun ki briew, ka lah ban pynjulor ia u phlang bad kawei ruh ba kam don satia ka jaka pynieng kali”.
