Shillong, Risaw 15 : U Myntri Rangbah ka Jylla Conrad K Sangma ula kyntait ia ka jingkynnoh ba ka don ka jingtih uranium ha ri-lum Garo, haba pynpaw ba kam don satia kano kano ka sakhi satar ne ki jingtip ban kyrshan ia kum kane ka jingkam.
“Kam don satia kano kano ka kam lane ka sakhi lane ka jingtip kaba pyni ba kum kane ka kam kala iaid ha ka thain” ong u Conrad haba iakren bad ki lad pathai khubor ha ka sngi Balang haba jubab ia ka jingkynnoh ba dang shen da u MDC ka BJP na Tura Bernard N Marak.
Ula kyntu ia une u nongialam sain pyrthei ba kynnoh ba un wan shakhmat bad ki jingtip ba bniah lem bad ki sakhi, haba kular ba ka Sorkar kan leh eiei mar mar lada shem ia ka sakhi.
“Ki nongialam kiba don ha ka kyrdan ba don jingkitkhlieh, kim dei ban shi kren ia kum kane ka jingkren tang namar ba ki kwah ban pawkhmat lane tang ban ioh kren” ula ong haba bynrap “Lada dei kaba shisha, kan dei shisha ka kam kaba sngewkhia bad lad aka dei, ai ba kin wan shakhmat ha ryngkat ki jingtip ba bniah bad ki sakhi bad khlem pep, ka Sorkar kan dei kaba nyngkong ban leh eiei”.
Haba ban biang ia ka nongrim jong ka Sorkar ba pyrshah ia ka jingtih uranium, u Conrad ula ong “Nga la dep ban kren da kaba shai kdar bad ngi ieng skhem ha ka nongrim ba ka jingtih uranium kam dei ban jia”.
Hynrei ula ong “Ki lah ban don kiei kiei kiba jia ia kaba ka Sorkar kam tip satia, hynrei lad aka don bad lada ka sakhi ka don ne ka jingtip ba bniah ka don, sngewbha wan sha ngi bad ngin da kmen palat ban leh eiei bad ban shim ia ka sienjam kaba dei halor kane”.
