Kyntait ki Nongtrei SSA ia ka jingpynkiew tulop ba 25%, dawa beit ia ka 80%

Shillong, Naitung 31 : Ka All Meghalaya SSA Non-Teaching Staffs Association (AMSSANTSA) kaba la sdang ia ka jing iashong kyllain mungor hynne ka sngi Balang, kala kyntait ban pdiang ia ka rai pynkiew tulop ka Sorkar da 25% hynrei kala ieng skhem halor ka jingdawa ba 80%.

U Commissioner & Secretry ka Tnad Education, Vijay Mantri, ula leit iakynduh ia kine ki Nongtrei ka SSA ha ka jaka iakhih ha madan Malki hynne ka janmiet bad kular ba ka Sorkar Jylla kan sa shim ia ka rai halor ka jingdawa jong ki la sngi Palei.

“Nga la iakynduh ia ki bad sngap ia ki. Nga la dep pyntip ia ki jingdawa jong ki sha u Myntri Rangbah ka Jylla. Lashai u Myntri Rangbah ula khot ia ka jingialang ba kyrkieh bad ki Ophisar ban iakren bad shim rai halor ka jingdawa jong ki. U Myntri Rangbah ula iakren ruh bad ki lyngba ka phone bad pyntip sha phi ba ka Sorkar kan sa ai jingmynjur ia ka jingdawa jong ki” ong u Mantri.

Ha ka 26 tarik Naitung, ia ka rai ka Sorkar ban pynkiew ia ka tulop ki Nongtrei ka SSA da 25% la pyntop da u Special Officer incharge ka tnad Pule Puthi ha ka shithi bala phah sha u State Project Director, Samagra Shiksha (SEMAM) & Director of School Education & Literacy, Meghalaya.

Haba iakren bad ki nongthoh khubor, u Finance Secretary ka Association Ricky Shullai ula ong “Ngi la ioh pdiang ia ka shithi na u Director ka DSEL halor ka rai ka Sorkar ban pynkiew ia ka tulop jong ngi da 25% hynrei ha ka jingialang jong ngi mynta, ngi la shim rai ban ieng skhem beit halor ka jingdawa ban pynkiew 80% nalor ka 5 % ka jingpynkiew ba manla u snem. Kan ka long namar ka jingpynkiew tulop ba khatduh ka dei kaba la leh ha u snem 2016”.

Ki don haduh 1037 ngut ki nongtrei (non-teaching staff) hapoh ka prokram SSA ha kaba 35 ki don ha ka state leven, 295 ha ka district bad 707 ngut ha ka block level.

Ka Sorkar kan donkam ban pynlut haduh T.3.19 klur ban pyntreikam ia ka rai ban pynkiew tulop ia ki nongtrei SSA da 25%.