Shillong, Jymmang 06 : Ka Voice of the People Party (VPP) kaba la hylla surok baroh shikatta bad dang iai bteng ruh ban hylla ba dei ban pynkylla noh ia ka State Reservation Policy, kala kyntait ban leit iashimbynta ha ka jingialang ban iakren halor ka kaiphod jong ka Expert Committee halor ka State Reservation Policy.
Kane ka dei ka jingialang jong ka All Party Meeting ne jong baroh ki seng sain pyrthei kaba la khot da ka Sorkar hynne ka sngi Balang ha Secretariat.
Haba jubab ia ka shithi khot jingialang kaba la phah da u Deputy Secretary ka Tnad Personnel & Admv. Reform (B) ka Sorkar Jylla, u President ka VPP Bah Ardent M Basaiawmoit ula pynpaw ia ka jingbym lah ban iashimbynta ha kane ka jingialang All Party Meeting.
U Bah Ardent ula pynpaw ba ka por kam iahap satia na ka bynta kane ka jingialang. “Ia mynta, ngi dang bunkam bad ki ishu ba kongsan ba ktah ia ka Jylla bad ia ki paidbah kaba donkam ia ka jingshimkhia ba kyrkieh na ka Sorkar” ula ong.
Kumban shu pynkynmaw, u Myntri Rangbah ka Jylla ula wanrah ia ka kaiphod jong ka Expert Committee on State Reservation Policy ha ka 18 tarik Rymphang hapoh ka Dorbar Mang Tyngka ka Iingdorbar Thaw Ain.
Kat kum kane ka kaiphod, ka Expert Committee kala ai jingmut ba dei ban pynnbeit beit kumjuh ia ka State Reservation Policy 1972 kumba ka long, haba kdew ba bun ki Kynhun kila ai jingkyrshan ban pynneh namar ka jingma ba kan sa shah ktah lada poi sha ka jingbishar ka Iingkashari lada pynkylla.
U Myntri Rangbah ka Jylla Conrad K Sangma ha kane ka juh ka Dorbar, ha ka 25 tarik Rymphang, ula maham pyrshah ban pynkylla ia ka Policy haba kdew b aka lah ban ngat ha ka jingshah bishar jong ka Iingkashari.
Kane ka jingmaham kala mih ha ka jingiatai ia ka zero hour notice bala wanrah da u President ka VPP uba la tyrwa ban pynkiew 7% ia ka bhah ki paid Khasi haba pynneh kymjuh ia ka bhah jong ki paid Garo. Ia kane ka notice la wanrah lang bad u MLA ka North Shillong Bah Adelbert Nongrum.
Haba wanrah ia kane ka mat, u President ka VPP ula iathuh ba ka VPP kam pat hun satia bad kam sngewtynnad satia bad ki jingai jingmut jong ka Expert Committee haba dawa ban don shuwa ka jingiakren shuwa ba ka Sorkar kan pyntreikam ia ka.
Baroh ki seng sain pyrthei- ka United Democratic Party (UDP), Bharatiya Janata Party (BJP), Trinamool Congress (TMC), National People’s Party (NPP), Khun Hynniewtrep National Awakening Movement (KHNAM) bad Hill State People’s Democratic Party (HSPDP) – kila iashimbynta ha kane ka jingialang ban ai jingkren ruh halor ka kaiphod jong ka Expert Committee.
Ia ka jingialang la pyniaid da u Myntri Rangbah ka Jylla Conrad K Sangma uba la khot ban pan ia ki jingai jingmut na ki seng sain pyrthei halor ki jingai jingmut jong ka Expert Committee on State Reservation Policy.
Haba iakren bad ki nongialam sain pyrthei, kila pynpaw ba ka Sorkar kala pynurlong ia ka jingkwah ka VPP da kaba khot ia ka jingialang jong ka All Party hynrei kyndit ban iohi ba u President ka VPP ula kyntait pat ban wan sha ka jingialang.
“Kan don jingmut aiu ban hylla surok bad pynsyrwa kai ia ka por u paidbah lada kiar pat ia ka rynsan kaba dei” kila pynpaw.
 kaba la hylla surok baroh shikatta bad dang iai bteng ruh ban hylla ba dei ban pynkylla noh ia ka State Reservation Policy, kala kyntait ban leit iashimbynta ha ka jingialang ban iakren halor ka kaiphod jong ka Expert Committee halor ka State Reservation Policy.){kind=link}