Shillong, Sept 14: Ka Khasi Students’ Union (KSU) kala pynpaw ba ka jingkam jongu Myntri ka tnad Food & Civil Supplies u Bah Comingone Ymbon ba ka jingbym don ka rel kala pynmih ia ka jingkiew dor ki marbam mardih kiba wan nabar kadei tang ban iada rapjot ia ka jingpulom ka sorkar ban shimkhia ia mat kaba ktah ia ki paidbah jongka jylla.
“Lyngba kane ka kyrwoh, ngi kyntu ia ki paidbah ba kim dei ban shah ialam bakla da kitei ki jingkren ki bym don ia ka jingkitkhlieh” ong u general secretary ka KSU u samla Donald V Thabah.
Ka KSU kala iengskhem ruh ha kaban pyrshah ban pyntreikam ia ka lynti rel ha rilum Khasi-Jaintia.
“Ka KSU kala ieng ban pyrshah ban pyntreikam ia ka lynti rel naduh ka por jong u Bah Bull Lyngdoh bad ka dawbah kadei ba ka KSU kam lah ban pdiang ia ka rel katba ym pat pyntreikam ia ki atiar ban tehlakam ia ka jingwan rung kyrthep ki briew kiba nabar shapoh ka thain” ula ong.
“Dei halor lane ba ngi la iai dawa ba dei ban pyntreikam ia ka Eastern Bengal Frontier Regulation 1873 ne ka Inner Line Permit (ILP),” ula bynrap.
U Donald Thabah ula pynkynmaw ruh ia ka jingiakhih ha ua snem 1989 ban pyrshah rel bad kala bteng biang ia katei ha u snem 2017 haba ka North East Frontier Railways (NEFR) kala sdang ia ka jingtei ia ka lynti rel na Tetelia sha Byrnihat. Palar 40 ngut ki dkhot ka KSU kila shah kem.
Katkum ka jingong ka jongu, ka jingjia ha u snem 2017 kadei ka nuksa bad ka jubab ia ka sorkar, ba ka KSU kan ym kynrandien ban leh da kaba tyngeh lada ka pyrshang ban thombor khlem da pyntreikam shwa ia ki atiar kiba khlain bad kaba janai kum ka ILP.
