Shillong, Jymmang 29: Ka Khun Hynniewtrep National Awakening Movement (KHNAM) hynne ka sngi Nyngkong, kala rai ban nym leit iashim bynta haka jingialang jong ka Committee on Reservation Roster ba lamkhmat daka Myntri ka tnat Law kong Ampareen Lyngdoh.
Kane ka jingkyntait kadei namar ka sorkar kala phah ka jingpyntip kynsan kynsan kata shi kynta hashuwa ban long ka jingialang jong ka Committee on Reservation Roster haka jingdon lang baroh ki nongialam sengsain pyrthei.
Lyngba ka kyrwoh u president ka KHNAM u bah Pyndap Saibon ula ong “Ka long ka bym lah ban pdiang ban iohi baka sorkar jylla ka phah iaka jingkhot ban ia don bynta haka jingialang tang shi kynta hashuwa ban long ka jingialang jong ka Committee. Ka Party kala rai ban nym iadon bynta ha kane ka jingialang”.
U bah Pyndap ula ong ba ka Party kala dep ban phah daka shithi shaka Myntri ka Law kaba dei ruh ka Chairperson jong ka Committee on Reservation Roster ha kaba “Ngi la pynsngew iaka nongrim ba kala donkam ban phai biang shaka State Reservation Policy 1972 bad ki OM naka bynta ban pynthikna ba ka Roster Registers kadei ban treikam naduh u bnai Jymmang 2022 khnang ban pyntreikam iaka Roster System nangne shakhmat (Prospective)”.
“Ngi ieng haka nongrim jong artylli ki jingdawa bad naka liang ka Party kam kwah ban pyndem hakhmat kine artylli ki jingdawa. Namar kane kam don jingmut ban shim bynta haka jingialang namar ym donkam shuh ban iatai hynrei donkam beit iaka sorkar ban wanrah daka Resolution” ula ong.
