Shillong, Nailar 22: Ka Iingkashari Meghalaya High Court ha ka sngi Ba-ar, kala kyntait ban shong bishar ia ka mukotduma writ petition bala mudui da u Nongtrei monsngewbha Tennydard M Marak pyrshah ia u MLA ka NPP na Williamnagar bad Myntri Sorkar Marcuise Marak halor ka jingkynnoh ba u pynkhein ia ka Model Code of Conduct ha ka elekshon MLA, 2023.
Kane ka hukum kala mih na ka iingkashari u Justice HS Thangkhiew uba la pynwai ia ka mukotduma ryngkat ka jingsiew ba T.15000 kaba hap ban siew hapoh ka 15 sngi sha ka Meghalaya State Legal Services Authority na ka bynta ki kam pyniarap iasaid ain.
Ia kane ka writ petition la mudui ruh pyrshah ia ka jingbym leh eiei jong ka Election Commission of India, Chief Electoral Officer ka Jylla Meghalaya bad kiwei ki Ophisar pyniaid elekshon halor ka jingujor jong u nongmudui ia ka jingpynkhreh ia ki kyndon ka Representation of the People Act, 1951 bad ruh ia ka Model Code of Conduct ha ka por ba long ka elekshon MLA 2023 ha Jylla da une u MLA ka Williamnagar.
U Tennydard ula kyrpad ban hukum ha kaban register ia ka case halor ka jingujor ba 23 tarik Rymphang 2923 bad ka ejahar ba 03 tarik Iaiong, 2023.
U Advocate General A Kumar haba jubab, ula iasaid ba kane ka jingkynnoh kaba don ha ka writ petition ka dei kaba long beit tang pyrshah ia u MLA ba u pynkhein ia ka Model Code of Conduct bad namar kata, ka nongrim jong kane ka mudui hi dalade kam iahap satia ban tian bishar bad ka dei kaba la khang da ka Article 329 (b) jong ka Riti Synshar ka Ri kaba la ong ba ym dei ban tian bishar ia kano kano ka elekshon sha ka Iingdorbar Parliament ne Assembly lait noh da ka Election petition.
Ula iasaid ruh ba ka kyndon 80 jong ka RP Act, 1951 kala kren shai ba ym dei ban shong bishar ia kano kano ka elekshon lait na ka election petition ka ban long kat kum ki kyndon jong kane ka bynta bad namar kata, kane ka mudui ka dei ia kaban hap kyntait.
Pule ruh: Pdiang burom ka Ri Bhoi Dorbar ia u MCS officer
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
