Ba khlem ailad u Lamphang ban iatai ia ka kaiphod CAG
Shillong, Iaiong 24 : Ka Iingkashari Meghalaya High Court kala kyntait ban pdiang ne ban shong bishar (entertained) ia ka mukotduma (writ petition) jong u MLA ka VPP na North Shillong Bah Adelbert Nongrum, kaba la mudui pyrshah ia u Lamphang ka Iingdorbar Thaw Ain ka Jylla.
Une u MLA ka VPP ula mudui ia kane ka mukotduma halor ka nongrim ba u Lamphang u khlem shah ia u ban wanrah ia ka mat iatai ba kyrpang (special motion) halor ka kaiphod Comptroller & Auditor General (CAG) halor ka Social and Economic sectors ba kut jong u snem 31.03.2022 ka Jylla Meghalaya hapoh ka Dorbar Mang Tyngka 2024.
U Advocate General ka Jylla A Kumar ula ban jur halor ka Article 212 jong ka Riti Synshar ka Ri, kaba ong ba kaei kaba la kynthoh ha ka writ petition ka dei ka rai jong u Lamphang, kaba ula leh ha kaba pyniaid ia ka Dorbar, ia kaba ym lah satia ban buh jingkylli da ka Iingkashari.
U AG ula pyntip ruh ba ka daw ba u Lamphang u khlem shah ban iatai ia kane ka mat bala wanrah da une u dkhot ka Iing (MLA ka VPP) ka dei namar, ka kaiphod CAG ka dang don hapoh ka jingbishar jong ka Committee on Public Account (PAC), kaba la thung kat kum ka Rule 241 jong ka Rules of Procedure and Conduct of Business, bad ba kam don satia ka jingle beain lane be-riti ia ka jingleh u Lamphang.
Kat kum ka hukum ka Iingkashari la ong, watla kala don ka jingkdew ia ka Article 194 (1) jong ka Riti Synshar ka Ri, ba pyrshang ban pynmynjur ia ka Iingkashari ba, ka hok jong u nongmudui kala shah pyrrkhing ha u Lamphang, namar kata kala pynlong ia ka rai kaba be-riti, ka dei ia kaban shim b aka Article 194 (1), watla ka ai ia ka hok ban kren laitluid hapoh ka Iingdorbar jong man ki Jylla, hynrei kane ka shong pat ha ka Riti Synshar bad ha ki Rule bad Standing Order kiba teh kyndon ia ka rukom pyniaid ia ka Iingdorbar Thaw Ain.
Ka hukum ka ong, namar kine kiei kiei, ka rai jong u Lamphang ban nym shah ia ka special motion, yn ym lah ban khein ba ka long kaba beain lane be-riti.
