Ba thwet ki Pulit namar ka jingshah hiar thma u CM ha Tura
Shillong, Nailar 12: Ka Iingkashari Meghalaya High Court ha ka sngi Thohdieng, kala kyntait ia ka jingpan bah jamin lypa jong ki lai ngut ki Nongialam ka seng ACHIK bad ka GHSMC namar ka jingshah thwet ha ki Pulit halor ka jinghiar thma ki paidbhur ia ka Chief Minister Office (CMO), Tura ha ka 24 tarik Naitung katba u Myntri Rangbah ka Jylla Conrad K Sangma u dang iakren bad kine ki kynhun halor ka jingdawa Winter Capital bad ka Roster System.
Kine ki laingut ki Nongialam ki dei u Labenn Ch Marak uba dei u President ka ACHIK, ka Bernita R Marak kaba dei ka General Secretarybad u Balkarin Ch Marak uba dei u Co-Chairman ka GHSMC.
Ka Iingkashari u Justice W Diengdoh, haba bishar ia ka jingkyrpad jong kine ki laingut kala pynpaw ba kam lah satia ban tuklar ia ka jingiaid ka jingtohkit jong ki Pulit halor kane ka jingjia namar ka don ka kyndon 43D (4) jong ka UAP Act kaba khang ban ai jamin.
Kum ban shu pynkynmaw, ki paidbhur kila hiar thma ia ka Chief Minister Office (CMO) Tura ha ka 24 tarik Naitung katba u Myntri Rangbah ka Jylla Conrad K Sangma u dang iakren bad ki Nongialam ka ACHIK bad ka GHSMC halor ka jingdawa Winter Capital bad ban pyntreikam ia ka Roster System jong ka Reservation Policy naduh ki snem bala leit noh.
Ha kane ka jingjia, haduh 18 ngut ki Pulit bad ki CrPF kila mynsaw na ka jingshah kawang maw bad haduh 20 tylli ki kali Sorkar bad kali shimet kila julor bad shah wiang ding.
Ki Pulit kila register case ia kane ka jingjia ha Araimile Police Station kat kum ka Case No. 16(07) 2023 hapoh ka kyndon 120B/121/121A/188/307/326/353/435/511/143/147/148/149/150/153/153A
/155/158/34 IPC pule lang bad ka kyndon 13 jong ka Unlawful Activities (Prevention)
Act bad ka kyndon 6A/6B/8A/8B jong ka Meghalaya (Maintenance of Public
Order) Act bad ka kyndon 3/4 jong ka Prevention to Damage to Public Property Act.
U Nongiasaid Ain S Deb ba mihkhmat ia ki nongmudui, ula batai ba ki nongmudui kim don bynta satia ha katei ka jingjia watla ki dei kiba don lang ha ka jaka ba jia. U pyntip ba kine ki laingut ki dei kiba iadonlang bad u Myntri Rangbah ka Jylla ha ka por ba jia ha kane ka jingjia bad bay m lah ban ong ba ki donkti bad kaei kaba jia shabar ka CMO.
Hynrei ula pyntip ba ki nongmudui kila ioh jingtip na ki tyllong khubor ba la don ki jingkynnoh ba ki dei ma ki, kiba suhbuit bad kynshit ia kane ka jingjia kaba pynlong ia ki pulit ban wad bad ban kem ia ki.
Une u Nongiasaid ula pynpaw ruh ba nalor kiba bun ki jingkynnoh hapoh ka IPC, ka jingkynthup lang ia ka kyndon 13 jong ka UPA Act ka dei tang ka jingthombor ia ki nongmudui bad ban pyrrkhing ia ka jinglong laitluid jong ki bala pynkupbor da ka Article 21 jong ka Riti Synshar ka Ri India.
Hynrei u Advocate General (AG) ka Jylla ula pyntip ba ka jingkhraw jong ka jingjia kaba buh ha ka jingma ia ka jingim jong ki heh ki hain khamtam ia u Myntri Rangbah ka Jylla, ka dei hok ban pynngat hapoh ka kyndon Unlawful Activity jong ka UAP Act.
Halor kine kiei kiei, ula iasaid ba ia kane ka jingkyrpad jong ki nongmudui ban ai jamin lypa kam dei ia kaban pdiang namar la khang ka kyndon 43D (4) jong ka UAP Act, 1967.
U AG ula kdew ruh ia ki jingthoh jong ka case diary ha kaba u IO ula pynpaw shai ba kine ki nongmudui ki dei kiba iadonlang ha kane ka sngi kata ha ka 24 tarik Naitung, 2023 ha Mini Secretary Building bad ki don ruh ki jingiathuh bala buh jingthoh jong ki Nongai sakhi ba pynpaw ba ki shah kynshoit ha kine ki nongpan jamin ba kin wan iakhih ha kane ka jaka.
Ka Iingkashari kala ong ba na ki jingthoh ha ka case diary la shem ba ka jingdonkti jong ki nongpan bah jamin ka dei kaba la iathuh da ki katto katne ki sakhi hynrei u IO u khlem pat lah pat ban batai ia ka bynta bala leh da kine ki nongpan jamin ha kane ka jingjia.
“Hynrei long kat kaba long, haba peit ia ka jingkhraw ki jingkynnoh, ia mynta hi ka Iingkashari kam lah ban tuklar bad ka jingiaid ka jingtohkit” ong ka hukum.
Halor kine ki jingshem, ka Iingkashari kala bthah ia u Registry ban phah biang ia ka case diary sha ki Pulit haba pynwai noh ruh ia kane ka jingtiar bishar.
Pule ruh: Pynpaw ka UDP ba dei ban pyntreikam noh ia ka NEP ha Jylla
, Tura ha ka 24 tarik Naitung katba u Myntri Rangbah ka Jylla Conrad K Sangma u dang iakren bad kine ki kynhun halor ka jingdawa Winter Capital bad ka Roster System.){kind=link}