Shillong Jymmang 28: Ka Kynhun kieng atiar kaba la shah kheiñ be-aiñ ka Hynniewtrep National Liberation Council (HNLC) ha ka sngi Baar, kala kyntait mardor ban don ia kano kano ka jingiadei bad u Synshar Khymdeit bad u Wallamjingsuk Barim, kiba la kam ba kidei ki “Area Collector” jong ka seng.
Katei ka long kum ka jingpynpaw halor ki khubor halor ka shithi ba la thoh da uwei u lanot uba la ioh iaka kot dawa pisa na ka seng ban pyntip sha u President ka Shillong Press Club ban pynithuh ba u Synshar Khymdeit udei u nonglum pisa jong ka seng, da kaba ong “Une u briew (Synshar Khymdeit) udei u juh uba la wan shakhmat ha ka sien kaba la dep ha Shillong Press Club ban kyntait ia ka jingdonbynta”. Ha katei ka shithi la jer ruh ia ka kyrteng jong u Wallamjingsuk Barim kum u Area Collector jong ka HNLC.
Katkum ka kyrwoh khubor, u General Secretary ka HNLC u bah Sainkupar Nongtraw ula ong, ba ka jingkynnoh dawa pisa u bah Synshar Khymdeit bad ka jingkam ba u dei u “Area Collector” jong ka HNLC kam don eiei hynrei kadei tang kaba la shu shah ialam ha ka buit kam sain pyrthei.
“Ngi shim ïa kane ka jingïathuhkhana, kum ka jingpyrshang ban pynjah burom ïa ka kyrteng jong ka seng jong ngi lyngba ki jingkynnoh kiba thok, kiba lamler bad ki jingkam kiba pynkyndit” ula ong bad ka bynrap “Ngi kyntait mardor ba ngim don kano kano ka jingïadei bad u Synshar Khymdeit ne bad u Wanjingshai (Wallamjingsuk). Lada ki pulit ki don shisha ia ka jingthmu kaba bha ban ai ia ka hok, kumta kadei ka kam ka jongki ban kem ia u Synshar Khymdeit, bad ban khein ia u kum uba ki suba jur bad ban pynlong ia ka jingtohkit kaba thikna ym ban thaw ia ki khana ki bym don ia ka jingshisha lyngba ki nongkhaii ki bym lah ban tip ne lyngba ki lad pathai khubor”.
“To ngin buh ha ka rekod, ba ha ka 24 tarik u Naitung, 2023, ka Meghalaya Police kala pynbna paidbah ba ka shithi kaba don ia ka Letterhead jong ka HNLC kaba la pynphriang ka dei kaba shu thok. Kane ka jingithuh da ki bor kiba dei khmih kala pynduh lut syndon ia ka “sakhi sabut’ ia kaba mynta ka pynmih biang ban thaw ia ki khana kiba rim. Balei la pynmih biang ia kane ka kot kaba thok la pyniaid pat lyngba ki shithi ki bym lah ban tip bad ban thaw ia ki khana ha ki lad pathai khubor? La buh jingkylli u Bah Nongtraw.
Ula kam shuh shuh ba ka kynhun ka don ïa ki jingtip kiba thikna kiba napoh ba ia ka kyrteng jong u Synshar Khymdeit kadei kaba la pyndonkam bakla da kito kiba la phet na ka seng HNLC na ka bynta ka jingmyntoi shimet ka jongki bad ban bteng ban leh ïa ki kam kiba be-aiñ hapoh ka syrngiew jong ka seng.
“Udei uba leh ia ka facebook account ha ka kyrteng ‘Bah Bah Suting’. Ka long ruh kaba kongsan ban pynpaw ba ka HNLC kam pat ju ai kano kano ka ‘Letterhead’ kaba don ia ka Joint Signature ne ka jingiasoilang, kaba long ka lama saw kaba shai bha ha kane ka jingjia”, la pynpaw u Bah Nongtraw.
“Shuh shuh, u nongïalam ka HNLC ula kynnoh da kaba ong, “Kane ka sma kum ka jingleh kaba lah da pynkhreh kyrpang lehse kadei ruh kaba la thaw ne shan da ki briew kiba don hapoh jongka tnad pulit hi ban thaw ïa ka khana jong ka jingbyrngem bad ka jingtieng bad ban bteng ban pynlong ia ka seng HNLC kum ka seng kaba bymman ha khmat jong ki paidbah”.
“Ki pulit ki dei ban leh iala ka ‘Homework’ ha ka jaka ban pyndonkam ia ki lad pathai khubor kum ka jaka bishar bad ban sangeh noh ban ialehkai bad ka jingsheptieng jong ki paidbah ban pynurlong ia ki jingangnud ha ki kam sain pyrthei. Kane ka jingpyrshang ban airong ia ka HNLC ha ka lynti ka bym die kan ym lah ban seisoh. Ngi kyntu ia ki paidbah ban long kiba husiar, ban buh jingkylli ia kine ki jingiathuhkhana bad ban ym ngop ha ka jingleh thok jong ka sain pyrthei bad ka jingleh drama ha ki lad pathai khubor.
 ha ka sngi Baar, kala kyntait mardor ban don ia kano kano ka jingiadei bad u Synshar Khymdeit bad u Wallamjingsuk Barim, kiba la kam ba kidei ki “Area Collector” jong ka seng.){kind=link}