Nongstoin, Nailur 04: U Sirdar ka Hima Nonglang Bah B Nianglang, ula kynnoh ba ka jingpynhap jong ka Sorkar Jylla ia ki 11 tylli ki Shnong sha Assam ka dei kaba la leh da ka jingibein ia ki Nongsynshar ka Hima.
Kat kum ka jingong jong u, ka jingbym pan jingmut shwa na ki Nongsynshar Hima la ka dei ki Syiem ne ki Sirdar, ka dei ka dawbah kaba pynmih ia ka kynrum kynram ha ka jingiapynbeit pud jong ka wat ba nyngkong.
“Ka jingjaw ummat jong ki longkmie na ki khatwei tylli ki shnong, kiba la shah khynñiat jubor sha Assam,ka la pynpait dohnud ym tang їa ki paitbah nongshong shnong hapoh ka hima hynrei ia ki hajar phew hajar ki longkmie hapoh ka jylla kiba їohi lyngba ki lad pathaikhubor bapher bapher” ong une u Sirdar haba iakren bad ki nongthoh khubor.
Une u Nongsynshar Hima ula pynpaw ruh ia ka jingsngew thamula ba ki arngut ki Nongmihkhmat ka Rambrai-Jyrngam kata u MLA Bah Kimfa Marbaniang bad u MDC Bah Bajop Pynrope kila pynksan ha ki lad pathai khubor da kaba kam ba ki don tang lai tylli ki Shnong kiba la pynhap sha Assam.
“ Kitei ki nongmihkhmat kim tip satia їa ka jingshisha bad ki shu pynksan tang ban da rap jot namar mynta ki la leit pynїasoh sha ka NPP” ula kynnoh.
“Na ka liang ka hima ryngkat ka Hynñiewtrep Youth Council, kin їai pyrshah bad kin їai dawa ba ka sorkar ka dei ban pynphai biang їa kitei ki khatwei tylli ki shnong sha West Khasi Hills. Mynta ka jingpynkhreh ban leit mudui sha ka Ïing bishar ba ha khliehduh jong ka ri ka Supreme Court ba don burom ka dang їaid shait shait” ula bynrap.
U Bah Nianglang ula ong kynnoh ruh ia u Myntri Rangbah ka Jylla ba u khlem sngap ne khein snep ia ka Regional Committee on Border Dispute jongka West Khasi Hills namar ka soskular iapynbeit pud bala iasoi kam iadei satia bad ka kaiphod bala phah da u Chairman bad ki Dkhot ka Regional Committee.
“Kat kum ka kaiphod ka Regional Committee, ki don tang ar tylli ki shnong kiba ym shym la pynhap ha ka Hima Nonglang Sirdarship, namar kitei ki shnong ki dei kiba la shnong la sah da ki Nepali bad ki Rabha naduh hyndai bad ki la dei pura ki shnong kiba hap ha ka Assam” ula iathuh.
