Shillong, Iaiong 11: U Rangbah Shnong ka Shnong Bhangarpar, West Garo Hills, Mottior Hussian hynne ka sngi Thohdieng, u la kynnoh ba u Taher Ali uba dei u lok jong ka Secretary jong ka VEC ka Samina Khatun bad u Majibor Ali u Rangbah Shnong jong ka shnong Pabomari, ki la lum pisa beain na ki paidbah ban pynioh skhim shna iing ba duk lane ka PMAY-G Scheme.
Haba kren shaki lad pathai khubor, u Mottior u la kynnoh ba u Taher Ali u la lum T.2000 ka pisa naki paidbah kiba dei ban ioh jingmyntoi naka skhim PMAY-G Scheme.
U Mottior u la kam ba haduh mynta ki don ym duna 38 ngut ki riew paidbah kiba la ai pisa shaka kynhun jong u Taher Ali bad u Majibor Ali namar ka jing tieng shah pynduh skhim shna iing ba duk.
“Hadien ba nga la ioh pdiang jingujor naki paidbah ka shnong Bhangarpar halor ka jinglum pisa, nga la leit ban ujor sha ka ophis jong u Block Development Officer jong ka Demdema CRD Block ha ka 18 tarik u Rymphang 2025 hynrei haduh mynta ka ophis kam pat leh eiei pyrshah iaki ba donkti lum pisa” la ong u Mottior.
U Mottior u la kynnoh ba hadien ka jingleit ujor shaka ophis BDO, ka kynhun jong u u Taher Ali bad u Majibor Ali ki la thombor ïa u hajan ka Bhangarpar LP School.
U la kynnoh ba 7 ngut ki briew ba kynthup u Enamul Islam, Messer Ali, Gulam Hussain, Mojibor Rahman, Tofishuddin Ahmed, Alom bad u Samsul Hoque kila thombor ia u lem bad iaki paidbah kiba la shah dawa pisa. “Haka 6 tarik Iaiong nga la ujor daka ejahar ha Police Outpost Bhogularbitha pyrshah iaki 7 ngut kiba la donkti ban thombor ia ngi” u la ong.
U Mottior u la kynnoh ruh ha kine ki briew ki dang iai bteng ban dawa pisa bad kila byrngem ruh ba kin sa leh da kaba tyngeh ia kino kino ki bym ai pisa.
“Kum u Rangbah Shnong nga dawa naki bor ka ain ban pynshitom ia u Taher Ali bad u Majibor Ali lem bad ia kiba don kti ban lum pisa naki paidbah ban ioh skhim shna iing ba duk” u la ong.
