Shillong, Rymphang 22: U nongïalam ka Indian National Congress (INC) u Rahul Gandhi hynne ka sngi ula kynnoh ba ka jingwan iuh kjat ka All india Trinamool Congress (AITC) ha Meghalaya kadei naka bynta ban pynkhlain shuh shuh iaka Bharatiya Janata Party (BJP) hapoh kane ka jylla.
Haba kren haka jingialang kaba la long ha madan Malki Shillong, u Rahul Gandhi ula kam ba ka TMC ka shu pyni ha ki lad pathai khubor ba ka pyrshah ne ka iakhun tyngeh pyrshah iaka BJP hynrei la sakhi ha kiwei ki jylla kum ha Goa ba ka don ka jingiasngewthuh jingmut bad ka jingiatreilang hapdeng ka BJP bad TMC.
U Rahul ula pynkynmaw ruh ba dang shen u Ajoy Kumar u ba dei uwei na ki nongialam ba rangbah ka All India Congress Committee (AICC) ula kren ruh ha kawei ka jingialang paidbah hapoh ka jylla Tripura ba ka TMC bad ka BJP ki long kawei.
“Ka TMC kadei ka paralok ba jar jar jong ka BJP bad ia kane ka sakhi hapoh ka jylla Goa bad ka TMC kan sa leh kumjuh hapoh Meghalaya namar ka TMC bad ka BJP ki don iaka thong ban pynpra iaka Votes jong ka Congress naka bynta ban pynkhlaiñ shuh shuh ïa ka BJP” la kynnoh u Rahul.
U Rahul ula kynnoh ruh ba kum ka BJP, ka TMC ruh ka rhah bor bad kadei ka Party ka bym don nongrim bad ka don iaka thong kum ka BJP kata ban long pyrshah iaka bha ka miat ki paidbah ka jylla Meghalaya.
Ula bynrap ba naduh ki snem mynshwa baroh ki tip ba dei tang ka Party Congress kaba bit ba biang naka bynta ban shynshar hapoh Meghalaya namar kadei ka Party kaba pynioh jylla ba pura iaka Meghalaya, kadei ka Party kaba pynioh iaka khyrnit ba hynriew bad baroh ki paidbah hapoh kane ka jylla ne hapoh ka ri India ki tip ba dei tang ka sorkar ba synshar ka Congress, kaba burom lut ia baroh.
Halor kane, u Ajoy Kumar ba dei u nongïalam ka All India Congress Committee (AICC), u la kren ïa kijuh ki kyntien ha ka jingïaid paidbah ha ka jylla Tripura mynta u bnai, ha kaba u la kynnoh ba ka TMC ka ïalehkai khang ban kyrshan ïa ka BJP.
Nalor kane u Rahul Gandhi ula kam ruh ba ka jingwan jong u ha Meghalaya kadei ruh ban pynshai paidbah ba ka Congress kan iada niam ka rukom, ka riti ka dustur, ka kolshor ki paidbah bad iaka jinglong tynrai bad kiwei kiwei de.
U Rahul ula ther ia ka BJP bad iaka Rashtriya Swayamsevak Sangh (RSS) da kaba kynnoh ba kine kim bym burom bad ki pyrshang ban thombor iaka bad ban pynjot ïa ka kolshor, ka riti ka dustur, ka niam ka rukom, bad nga wan hangne ban ïathuh ïa phi ba ngi ïeng bad phi ha kane ka jingïaleh jong ki paidbah ka jylla Meghalaya.
“Ka Congress kan ym shah ïa ka ka BJP ban pynsniew ïa ka ktien ka thylliej jong phi, ka riti ka dustur jong phi, ka niam ka rukom jong phi, ka kolshor jong phi bad ka histori jong phi bad ka jylla baroh kawei, ka Congress ka burom bad kan iada ia kine baroh” ula ong.
