Shillong, Nailur 23 : U Nongpan RTI Bah Disparsing Rani hynne ka sngi thohdieng ula kynnoh ia ka Meghalaya Urban Development Authority (MUDA), ka Ophis u Deputy Commissioner, West Khasi Hills bad ka North Eastern Indira Gandhi Regional Institute of Health and Medical Sciences (NEIGRIHMS) halor ka jingbym lah ban thung nongtrei ha ki kam kiba lait thylli ha ki Ophis jong ki.
Haba sot ia ka jubab RTI na ka MUDA, u Bah Disparsing ula ong ba namar ka jingbym lah ban pyntreikam ia ka Service Rules, ka MUDA kam shym la lah ban pynmih ia ki jingpynbna ban thung briew ha ki 30 tylli ki kam ba lait thylli.
“Kane kala plie lad ia arngut ki Myntri Sorkar ban thung nongtrei be-ain ha MUDA namar haduh mynta kam pat don satia ia ka Service Rules” ula kynnoh.
Ula pyntip ruh ba lyngba ka jubab RTI na ka Ophis u DC ka West Khasi Hills, la pynpaw ba ki don haduh 30 tylli ki kam kila lait thylli.
“Hynrei, ka Ophis ha ka jaka ban pynmih jingpynbna laitkam, kala thung pynban ia ki nongtrei da kaba shu shim na ki tnad bapher bapher” ula ong.
Ha kajuh ka por, u Ba Disparsing ula ong ba ka NEIGRIHMS ruh kam shym la lah ban thung nongtrei haduh 367 tylli ki kam nos kiba lait thylli.
“Ka long kaba lyngngoh ba ka NEIGHRIMS kam lah ban thung nongtrei ha kine ki kam ba lait thylli bad kane kala ktah jur ia ka jingshakri jong ka hospital” ong u Bah Disparsing.
Ha kawei ka liang, u Bah Disparsing ula kyntu ia ka Sorkar Jylla ban pyntreikam noh da ka One Time Scheme na ka bynta ki nonghikai Contracy kiba iakhih mynta la palat artaiew.
“Lada ka Sorkar kam lah ban thungkam biang ia ki, ka dei ban wanrah da ka skhim ban pynbeit ia ka kam jong kine ki nonghikai namar kam dei ka jingbakla jong ki nonghikai ban wan sha surok hynrei kane ka jia namar ka rai jong ka Sorkar Jylla ban pyntreikam ia ka MTET haba thungkam ia ki Nonghikai”ula bynrap.
