Shillong, Risaw 20: U Myntri ka rep ka riang bah Banteidor Lyngdoh ula kynnoh ba ki don ki riewshimet kiba la leit lum beain ia ki ‘EPIC’ bad xerox copy passbook na ki nongshong shnong ka Mawkynrew C&RD Block bad Mawryngkneng C&RD Block jong ka Mawkynrew konstitwensi da kaba kular ban ai skhim mar T.5000.
Hadien ba ioh ka jingujor na ki paidbah, u bah Banteidor ha ryngkat ka jingdon lang u Assistant Manager in-charge EFC ka Mawryngkneng Block u bah Albinus Nongkynrih, u BDO ka Mawryngkneng Block u bah G Dhar, ka BDO ka Mawkynrew Block ka kong A.R Kynta, ka tnat Meghalaya Basin Development Authority (MDA) bad ki nongtrei na kitei ki Block kila lum ka jingialang ban pynshai sha ki nongshong shnong haba iadei bad kane ka jingshah kular thok ki paidbah.
Kane ka jingialang kadei naka bynta ban pynsngewthuh paidbah iaka rukom pyntreikam ia ka skhim jingiarap na ka FOCUS bad FOCUS Plus kiba dei ki skhim jingiarap pisa ka sorkar jylla sha ki nongrep kiba don ha ki Producers’ Group.
Haba kren sha ki lad pathai khubor u bah Banteidor ula iathuh ba ula ioh pdiang ia ki jingujor naki paidbah halor ka jingdon ki riewshimet kiba leit pan passbook bad EPIC ryngkat bad ka jingkular ban ai jingiarap lyngba ka skhim ba T.5000.
“Ki paidbah kim dei ban sngewthuh bakla da ka shah ialam bakla ha ki riewshimet ki bym dei ki briew jong ka sorkar kiba leit lum ‘EPIC’ bad passbook namar ka long kaba ma ban shu ai ia ki Account Number sha ki briew kiba lah ban shim kabu” la ong u bah Banteidor.
U bah Banteidor ula kyntu ia ki paidbah ba ki dei ban sngewthuh bad wad bniah bha namar ha ki snem ba la dep la don ki briew kiba pan Passbook bad Account Number da kaba kular ai jingiarap pisa bad phah soi ha ka kot sada.
Ula iathuh ba ha ki snem bala dep ki briew kiba ïoh ia ka pisa T. 10 hajar kila ioh pdiang jingthoh naki Bank ba ki hap wan siew ia ka ram ba ki la shim kumba T. 2 lak.
“Ki paidbah ki dei ban pyrkhat bha bad ym dei ban shaniah klumar ia ki bym dei ki briew jong ka Block ne ka sorkar bad kidei ban kynmaw ba katei ka jingshah thok ki paidbah nongshong shnong mynta ka mukotduma ka la poi ha ka ban tohkit da ka CBI” la ong u bah Banteidor.
