Shillong, Nailur 15 :U MLA ka Gambegre Saleng A Sangma hynne ka sngi palei, ula kynnoh ba ka jaka ba dang tei ia ka Tura Medical College (TMC) kala kylla long ka jaka riehtngen jong ki kynhun kiengatiar.
“Ha kine ki khyndiat bnai, nga la ioh ia ka khubor ba kumba 70 ngut ki dkhot kaikhlaw kila rieh ha kane ka jaka (jaka ba tei ia ka Medical College)” ong u Saleng haba wanrah ia ka jingkylli bynrap hapoh ka Iingdorbar.
Une u MLA ula pan jingtip ruh la ka Sorkar Jylla kala ioh ia kano kano ka jingtip na ki bor syntiat halor kane khamtam ba kam don satia kano kano ka jingpeit ngor ia kane ka jaka, kaba la kylla long ka ktem riehtngen jong ki kynhun kiengatiar.
Haba jubab ia kane, u Myntri ka Koit ka Khiah James K Sangma ula ong ba um shym la ioh jingtip satia ba kum kata ba kan jia ha kane ka jaka ba tei ia ka TMC.
Hynrei ula kular ban sa bthah ia ka Tnad Home (Police) ba kan tohkit ia kane ka kam.
“Ngi la shim jingthoh ia kane bad ngan sa phah sha ka Tnad Home (Police) ba kin leh ia kaba donkam bad ban tohkit” ong u James.
U Myntri ula kular ruh ba ka Sorkar Jylla kala kitkhiah naduh ka mynsiem ban pyndep noh ia kane ka project ha kaban ioh pynsdang noh ia ka jingshakri jong kane ka College.
“Ngi la thung ia ka Committee bala khieh da u Secretary ka Tnad ka Koit ka Khiah uba la peit pyrman ia ka jingiaid jong ka jingtei bad ka jingiaid shakhmat jong ka project” ula ong.
U pyntip ba ka por bala buh ban pyndep ia ka project ka long ha ka 27 tarik Kyllalyngkot 2021 hynrei namar kiba bun ki daw kynthup ka khlam Covid-19, ka jingtei ia ka project kala shah ktah noh.
“Kumba kyrpad da ka kompani ba pyntrei ia ka project, ngi la aipor ban pyndep noh ia ka project hapoh ka 7 tarik Rymphang, 2023” ong u James.
Ka jinglut jingsep jong kane ka project ka long T. 243.82 klur ha kaba ka Sorkar Pdeng kala ai T. 172 klur. U pyntip ba ka pisa bala siew sha u contractor kala kot T. 41 klur kaba long kumba 17%.
Haba phai sha ka Shillong Medical College bala kylli da u MLA ka Nongkrem, u James ula ong ba hadien ba pyndam noh ia ka MoU, ka Sorkar kala khot mynta ia ki kompani ba thymmai lyngba ka PPP mode ban sdang pyntrei noh ia kane ka College.
U Pyntip ba ka Sorkar kala dep ai 50 acre ka jaka ha New Shillong Township ban tei ia ka Shillong Medical College.
