Shillong, Nailur 21 : U Symbud Myntri Rangbah ka Jylla Bah Prestone Tynsong hynne ka sngi Balang ula ong ba ka All India Trinamool Congress (AITC) kaba don ha ka Liang Pyrshah ka kwah ban pynthikna ba ka jingiakajia pud hapdeng ka Jylla Meghalaya bad ka Assam kan iai neh shirta lada ka shah jied ban wan ha ka bor synshar.
“Ka AITC ka kwah ban pynthikna ba ka Meghalaya bad Assam kin iai bteng shirta ban bat ia ka jingiateh “Status Quo” halor ka kam kajia pud lada ka shah jied ban wan ha ka bor synshar” ong u Bah Prestone halor ka jingkular ka AITC ba lada ka wan ha ka bor ha u snem 2023, kan pyndam noh ia ka MoU iapynbeit pud ba la iasoi da ki artylli ki Jylla.
U Symbud Myntri Rangbah ula ong “Ai ba ki paidbah ka Jylla kin sngewthuh ia kawei ka kam ba lada ki dei ban jied ia ka AITC ban synshar ia ka Jylla, ka AITC ka kwah ban pynthikna baka ‘Status Quo” kan iai neh haduh ba kut ka pyrthei”.
U Bah Prestone ula ong “Ai ba ki paidbah kin kylli ia ka AITC, hato ka dei kane ka lynti ban pynkylla trai biang ia ki kam halor ka iakajia pud?. Hato phi mut ong ba phi kwah ban pynneh ia kane ka jingiashrut khappud haduh ba kut ka pyrthei?”.
“Kane ka dei ka jingkylli jong nga sha ka AITC lada ki kwah ban pynkylla biang ia ka MoU. Nga ong ha phi ba ai ba ki paidbah kin pyrkhat shispah sien shuwa ban jied ia ka AITC” ong u Bah Prestone.
