Kynnoh u Bah Pala ba ka skhim VB-GRAMG ka dei ka jingthombor ia ki nongkyndong ba duk

Shillong, K’lyngkot 22: U Nongialam ka seng Congress u Bah Vincent H Pala ula ong, ba ka jingleh ka Sorkar Pdeng kaba la ialam da ka seng BJP ban pynkylla ia ka kyrteng jong ka Mahatma Gandhi National Rural Employment Guarantee Act (MGNREGA) sha ka VB-GRAMG Scheme kad ei ka jingthombor kaba la pynwandur bha pyrshah ia ki duk ki suk ha ki thain nongkyndong, ki nongbylla sngi bad ki longiing kiba kwah kam ha ka jylla Meghalaya.

Haba kren ia ki nongkitkam ka seng bad ki nongshong shnong ha ka jingialang paidbah kaba la pynlong da ka Meghalaya Pradesh Congress Committee (MPCC) ha Mawkyrwat, South West Khasi Hills District ban pyrshah jur ia ka jingpynduh noh ia ka MGNREGA.

U Bah Pala ula banjur ba ka MGNREGA kam dei satia tang ka skhim na ka bynta ka bha ka miat hynrei kadei ruh kaba la ithuh da ka aiñ kaba pynthikna ia ka hok ban trei, kaba la ioh ban pynneh ia jingiakhun jong ka riti synshar paidbah.

Kano kano ka jingpynduh noh ne jingbujli ia kane ka Act, ula ong, ka pyni ba ka Sorkar BJP ka don da kawei pat ka rukom leh kaba pher ia ka kamai kajih ha nongkyndong, ka jingai jingshngain ia ka imlang sahlang bad ka jingburom ia ka riti synshar ka ri.

Ha kane ka jingialang la iakren halor ki kamram kiba kongsan jong ka MGNREGA kaba kala leh ha kaban pynneh pynsah ia ki hajar tylli ki longiing ha South West Khasi Hills, khamtam eh ha ki jaka kiba don ha kyndong bad kiba shah ktah ha ka ioh ka kot.

Ki nongkren kila pynpaw, ba ka jingtyrwa ia ka VB-GRAMG Scheme ka duna ia ka jingai ia ka jingkhein jingdiah kaba khuid, ka jingkyrshan jongki kyndon aiñ, kaba pynthikna ia ki sngi jong ka jingaikam aijam, kaba pynlong ban duna bad kaba ym lah ban shaniah ia ka rukom buh hakhmat ia ki kam kaban iaid palat ruh ia ka jinglong kaba shisha ha kaban pynkupbor ha ka thain nongkyndong.

U Vice President ka MPCC u K. Lyngkhoi bad u Secretary ka MPCC u Manuel Badwar ruh kila ai jingkren ha katei ka jingialang.

Kila maham ba ka jingpyntlot bor ia ka MGNREGA kadei shi bynta jong ka rukom treikam ban iaid lait noh ia ka kam thaw aiñ kaba iadei bad iajan bad u paitbah ha kylleng jong ka ri.

Kila kyntu ia ki nongshong shnong ba kin long kiba iatylli bad ban long kiba peitngor pyrshah ia kino kino ki polisi kiban buh ha ka jingeh bad jingpynkhuslai ia ka jingbym shngain ka ioh ka kot ha ki thain nongkyndong.
Kane ka jingialang kadei ruh kaba kongsan ha u mawmer jong ka jingiaid lynti ka seng Congress ha kaba bun ngut ki riewshimet kiba pawkhmat kila wan ban pyniasoh noh ialade bad ka seng Congress.

Kine kiba la pyniasoh ki kynthup ia u Bah Denis Nongsiej u Joint Director barim jong ka Education Department, u Bah Barister Thyrniang u kyrtong jong ka KHNAM uba la iakhun ia ka elekshon MDC ha u snem 2024, u Bah Sngaphunlang Kharlyngdoh u Assistant Lecturer jongka Laban Assamese Higher Secondary School bad Kordorlyne Kharlyngdoh, Vice President barim jongka Trinamool Congress, Mawkyrwat.

Haba pdiang ia kine ki dkhot kiba thymmai, u Bah Vincent H Pala ula ong, ba ka jingshim rai ka jongki, ka pyni ia ka jingnang kiew ka jingbymhun ki paitbah ia ka jingshimkabu na ka kam politik bad kala nang pynthymmai ia ka jingshaniah skhem ha ka seng Congress kum kata ka seng kaba iai trei na ka bynta ka hok jong ki nongtrei, ka hok ia ka imlang sahlang bad ka jingai ia ka jingkhein kaba khuid ha ka kam synshar paidbah.

Ha kane ka jingialang la wan ban iashimbynta da ka Kong V. Syiemlieh ka President jong ka District Mahila Congress Committee, u Bah Iengskhem Syiemlieh u President jong ka District Youth Congress bad bun ngut ki nongkitkam ka seng kiba na ka Mawkyrwat bad Ranikor Block Congress Committee.

Ka MPCC kala pynpaw ba ka iengskhem ha ka nongrim ban iakhun pyrshah ia kano kano ka jingpyrshang ban pyntlot ia ka MGNREGA, hapoh ki shnong bad lyngba ki shnad treikam bad kala kular ban pynjur ia ka jingiakhih ha kylleng ka Meghalaya ban iada ia ka hok, burom bad ia ka kamai kajih jong ki nongshong shnong ha ki thain nongkyndong.