Shillong, Naitung 27 : Ka Khasi Students’ Union (KSU) kala dawa ia ka Meghalaya Public Service Commission (MPSC) ba kan sei paidbah (display) ia ki marks ba ioh da baroh ki nongiakhun ia ka eksam Meghalaya Civil Service (Prelims) hadien ka jingkynnoh ba don ka jingthung bym hok.
Ha kajuh ka por, ka KSU kala rai ruh ba shen kan sa phah da ka jingthoh sha u Myntri Rangbah ka Jylla Conrad K Sangma kaba long pyrshah ia ka rukom treikam jong ka MPSC.
Haba iakren bad ki nongthoh khubor hadien ka jingiakynduh ia u Chairman ka MPSC ha ka sngi Thohdieng, u Chairman ka KSU Employment Cell Reuben Najiar ula ong “Ngi la dawa ia u Chairman ka MSPC ban sei paidbah ia ki marks jong baroh ki nongiakhun ia ka eksam, kiba don ha ka original list bad kumjuh ruh jong ki 62 ngut ki nongiakhun eksam kiba don ha ka additional list, khnang ba kan shai sha u paidbah ba katno ki ioh ia ki marks bad katno ka marks bala buh ban pass”.
“Halor ka jingiakynduh jong ngi, u Chairman ula pyntip ba un sa khot ia ka jingiakynduh bad ki lad pathai khubor bad un sa pynshai ia baroh kiei kiei hakhmat ki lad pathai khubor” ula pyntip.
U samla Reuben ula pyntip ba ka Seng kala rai ruh ban sa phah da ka jingthoh sha u Myntri Rangbah kaba long pyrshah ia baroh ki jingleh bymhok namar kane kala iai jia na ka por sha ka por hapoh ka MPSC.
Kane kala mih hadien ka jingpynbna bala pynmih da u Chairman ka MPSC myn ha ka 23 tarik Naitung ba pyntip halor ka Additional list bad ki roll nombor (hadien ka rai jong ka Commission ban khmih bniah ia ka OMR answer sheet jong palat 63 ngut ki nongiakhun eksam) bad ruh ba pyntip ba ia ka written examination (mains) la buh ban long naduh ka 23 tarik Nailur, 2024.
Une u Nongialam ka KSU ula ong ba ka Union kala pan jingpynshai na ka Commission ia ka jingdon ki jingkylli ki ba bakla, kaba lam sha ka jingbynrap lang ia kine ki 62 ngut ki nongiakhun eksam lane kaei ka daw ba pynlong ia ka jingkhmih biang ia ka OMR sheet.
U samla Reuben ula ong ba kaei kaba paw ka long ba imat ia kine ki kam la leh da ka jingthmu ban ioh pynrung lang ia ki briew (nongiakhun eksam) kiba don jingiadei bad ki briew ba don bor.
Ha kajuh ka por, u samla Reuben ula pyntip ba ka KSU kala ioh iakren ruh bad u Chairman ka MPSC haba iadei bad ka jingthungkam Statistical Officer hapoh ka Tnad Veterinary.
