Tura, Risaw 05 : Ka jingleh donbor bad pynkhein ain jong ki briew ka ain ba phong Uniform kam dei satia ka kam ba thymmai bad ki Pulit ka West Garo Hills kila don lang ha ka thup hadien ba uwei u Pulit la kynnoh ba ula set along ia uwei u tynmen bad ia u Khun nalor ka shoh ka tied ia ki tang namar ka kam iakajia jaka ha ka thain Phulbari.
Namar ka jingsheptieng iala ka jingim na kane ka jingthombor, kine ki shikpa shikhun kila ujor noh da ka ejahar sha u Superintendent of Police ka West Garo Hills ha ka 3 tarik Risaw.
Ha ka ejahar bala phah sha u SP, kine ki shikpa shikhun kila pyntip ba kane ka jingthombor u Pulit ia ki kala jia ha ka 23 tarik Nailur hadien ba ka kynhun ki Pulit kynthup u Secretary ka Village Defence Party (VDP) kila wan sha iing jong ki ha Nayagaon, Bhaitbari.
Ki Pulit kila kurup noh ruh ia ka power tiller jong u Kpa Md Soyod Zamal da kaba kam ba la ju pyndonkam ia kane ka kor ban leit rep ha ka jaka kaba don hapdeng ka jingiakajia.
Ia kane ka power tiller la rah noh da ka kynhun ki Pulit haba bthah ia ki bahaiing hasem ba kin leit mih sha Phulbari Police Station ha ka por janmiet.
Dei haba u Kpa Zamal bad arngut ki Khun kila poi ha Police Station, kila iakynduh ia u Officer in Charge Yadav uba la kren tohmet da ki ktien khlem akor bad buh jingkylli ruh ba ki iohbor naei ban rep ha katei kajaka.
“U Kpa jong nga ula pyni ia ki kot ki sla jong ka jaka kaba dei ha ka kyrteng jong u bad ong ruh ba kam don satia ha ka jingiakajia. Wat ka pata jong ka jaka ba don 1 bigha bad 1 lesha ka don ha ka kyrteng u Kpa, une u Heh Pulit um shym la pynsngap satia bad kren sih kren sang pynban” iathuh u Md Intadul Islam.
Kat kum ka jingujor, la pyntip ba ia baroh laingut ki shikpa shikhun la ialam medical check up sha hospital da ka kynhun ki Pulit hynrei dei haba wan phai, kila ngat ha ka jingshah shoh shah bom ha une u OC bad ki briew jong u bad kila khynniat ruh sha along jong ka Police Staion bad pynshong haduh shikynta tam.
“U Kpa jong nga u dei uba pang klongsnam bad u dang shu wan sumar na Goalpara District ka Assam” ong une u Khun.
Ia kine ki shikpa shikhun la pyllait noh hadien ba ki Pulit kila dep shim statement na ki.
