Kynnoh leh politics ka KHNAM ba pynslem ka Sorkar ia ka elekshon MDC ha KHADC bad JHADC

Shillong, Nailar 16: Ka Khun Hynñiewtrep National Awakening Movement (KHNAM) ha ka sngi Thohdieng, ka la kynnoh ba ka Sorkar Meghalaya Democratic Alliance (MDA) ka la shim da ki buit sain pyrthei ban pynslem ha ka jingpynlong ia ka elekshon sha ki 2 tylli ki Autonomous district Council (ADC) ka Khasi bad Jaintia Hills.

Ka KHNAM ka la rai ruh ban thoh sha u Lat ka jylla u CH Vijayashankar ba un tuklar mardor bad leh ei ei halor kane ka kam.

Haba kren sha ki lad pathai khubor, u Working President ka KHNAM Bah Thomas Passah u la ong “Ngi pyrshah jur ia ka jingthmu jong ka Sorkar ban pynslem shuh shuh ia ka elekshon ADC. Kane ka dei tang ka buit sain pyrthei kaba la shim da ka Sorkar ban bat jubor ia ki bor ha ki ADC.”

“Ha ka riti synshar paidbah, ka dei jong u paidbah, da u paidbah bad na ka bynta ki paidbah hynrei mynta ha kine ki 6-7 bnai ba la dep, ki MDC ki dei jong ka MDA, da ka MDA bad na ka bynta ka MDA namar ka samoi treikam jong ki (MDC), ka la dep bad kut noh ha u Rymphang 2024” ula ong.

Haba kynnoh baka jingpynjlan ïa ka por treikam jong ki ADC kadei ka buit ban synshar dorbor daka Sorkar, u Bah Thomas u la ong, “Ngi la pynpaw ïa ka jingsngewsih ba ka Sorkar Jylla ka nud ban pyndonkam bakla ïa ka bor jong ka da kaba pynjlan “beaiñ ïa ka por treikam jong kine ki ADC.”.

U Bah Thomas ula ong ruh ba ki MDC kim dei ban shim tulop namar ba ka por treikam jong ki, ka la kut noh naduh u bnai Rymphang bad ka jingbteng ban shim tulop ka long kaba be-aiñ.

Ula ong “Kumta, ngi la rai ban thoh mardor sha u Lat ba un tuklar lang ia kane ka kam namar ba la shim noh ia ka hok jong ki paidbah ban jied iing thymmai ha ki ar tylli ki ADC da ka Sorkar kaba mynta.”

U Bah Thomas ula kam ba kam don satia kano kano ka jingjia kaba kyrkieh ne kano kano ka kam kaba ka Sorkar Jylla kan rai ban pynjlan ïa ka por treikam jong ki ar tylli ki ADC.

Haba kylli, u nongïalam ka KHNAM u la ong, “U Lat u la mynjur ïa ka jingtyrwa ban thaw Delimitation Committee hynrei ki don bun tylli ki shnong kiba la pyrshah. Mynta, ka mih ka jingkylli hato ka Delimitation Committee ka lah ban pyndep iaki kam haka por ba lyngkot.

Ngam kynnoh ia ka komiti namar ka por kaba lyngkot. Kane ka dei tang ki buit sain pyrthei ba la shim da ka Sorkar Jylla ban bat jubor iaki bor ha ki ADC.”

U Bah Thomas ula pynpaw ba u sheptieng ba ka Sorkar kan pynlong ruh ïa ka mat kaba ïadei bad ka jingthmu ban pynkylla ïa ka Sixth Schedule ha ka riti synshar ka ri India kum kawei pat ka daw ban pynslem shuh shuh ban pynlong ïa ka elekshon ADC.