Nongstoin, K’Lyngkot 20 : Watla ka jingiakren pynbeit pud ka dang iaid hapdeng ka Sorkar Meghalaya-Assam, la kynnoh ba ka Sorkar Assam ha kane ka kynti, kala kyntur pud sa sha ka shnong Kyrshai da kaba shna jubor ia ka Jingkieng halor ka wah Rambrai.
Ia kane la pyntip da u MLA barim ka Rambrai-Jyrngam bad President ka HSPDP Bah KP Pangniang haba iakren bad ka Shlem. Ula pyntip ruh ba kum u nongmihkhmat ka thain, ula leit ruh ban jurip dalade ia kane ka jingkieng kaba la pyntrei da ka Sorkar Assam.
Kat kum ka jingong jong u, kane ka jaka ba pyntrei ia ka Jingkieng ka dei kaba dang don hapdeng jong ka jingiakren pynbeit pud bad ka dei kaba dang hap hapoh ka Langpih sector nalor ki phew tylli ki shnong kiba don shaphang shatei na katei ka jaka ba shna Jingkieng.
U Bah Pangniang ula ong ba ha ka jingshisha, kane ka jingkieng ka dei ka bynta jong ka Sorkar Meghalaya ba kan pyntrei namar ka dei kaba hap lang ha ka surok Two Lane ba pyniasoh na Nongstoin-Rambrai haduh Kyrshai.
Ula pyntip ba kane ka surok ba pyntrei na Nongstoin-Rambrai-Kyrshai ka dei kaba dang poi tang haduh ka shnong Mawthir kat kum ka wat ba nyngkong kaba long 30 Km. U iathuh ba sa 40 Km eiei ka surok ka dang sah ban pyntrei kat kum ka Detailed Project Report )DPR).
U Bah Pangniang ula pynpaw ia ka jinglyngngoh ba ka Sorkar Meghalaya kala sngap jar jar ia kane ka jingwan pyntrei project jong ka Assam ha ki jaka kiba dang don hapdeng ka jingiakren pynbeit pud.
