Nongstoin, Rymphang 27 : Ka Federation of Khasi Jaintia & Garo People (FKJGP) Ri-Muliang Circle kala kynnoh ba ka Sorkar Assam kala kyntur pud biang sha ki thain Langpih bad pynshna ia ki surok ha kylleng ki jaka jong ka thain.
Kane ka Seng hapoh ka jingialam u President Bah Tipsuk Thongni, hynne ka sngi Palei, kala leit ban ai jingtip da ka jingthoh ia kane ka jingjia ha u Deputy Commissioner ka West Khasi Hills, Nongstoin.
Ka pyntip ba ka Sorkar Assam kala wan shna pynheh ia ka surok na Komphaduli kaba thmu ban pyniasoh shaduh sha Langpih.
Ka FKJGP kala pan jingshai na u Deputy Commissioner ban tip la ka Sorkar Assam kala dep pan jingbit ne kala don ne em ka jingiatip lem hapdeng ka Sorkar Meghalaya bad Assam halor kane ka jingwan shna surok.
Nalor kane, kala pan jingshai ruh la kane ka jingwan kam pynroi ka Assam ha Langpih kan don jingktah ne em ia ka jingiakren pynbeit pud hapdeng ka Meghalaya bad Assam namar ka jingdon bun tylli ki shnong Khasi bad Garo ki bym kwah ban hap sha Assam tangba ki dei kiba don sha shiliang jong ka surok ba pyntrei da ka Assam.
Kane ka Seng kala ong ba ha kum kane ka por ba ka jingiapynbeit pud ka dang iaid shakhmat hapdeng ki ar jylla, ka seng ka sngew pyrshah jur lada ka Sorkar Assam ka khlem pyntip lang iaka Sorkar Meghalaya halor kane ka surok, kaba lah ban wanrah ia ka jingthut bad jingkulmar hapdeng ki nongshongshnong.