Da ka umsaw hap dih ki khynnah pule, poi hospital bun ngut
Nongpoh, Naitung 26 : Ki Khynnah Skul ka Jawahar Navodaya Vidyalaya (JNV) kila kynnoh ba ki bor pyniaid jong kane ka shlem jingnang jingstad ka Sorkar Pdeng, kala bsa bam ia ki Khynnah da ki jingbam bala sma, ki jhur kila pyut bad haba pang ba shitom, la ai da ki dawai kiba kut ka por treikam (Expired) nalor ka jingpynslem ban ai ia ki sanitary pad ia ki Khynnah Kynthei .
Kane ka jingkynnoh kala mih ha ka jingmudui jong kine ki samla pule sha kawei ka kynhun Sengbhalang ka Ri-Bhoi District hynne ka sngi Balang, kaba batai lut ia baroh ki jingeh kaba ki khynnah skul ka JNV ki iakynduh na ka jingbym shimkhia jong ki bor pyniaid ia ka bha ka miat bad ka koit ka khiah ki Khynnah.
Ka Shlem haba ioh ia kane ka shithi mudui, kala hiar ban jurip ia kane ka skul ka Sorkar Pdeng kaba la tip kum ka Jawahar Navodaya Vidyalaya (JNV) Niangbari lum Ri Bhoi District bad iakynduh markhmat ia ki Khynnah pule kane ka skul kiba la pyntip ba bun ki Khynnah kila kem pang bad hap thiah hospital tang namar ka jingai umbam umdih da ka umsaw ba saw sarang. La iathuh ruh ba uwei napdeng kine ki Khynnah u dang shah sumar mynta hapoh ka Intensive Care Unit (ICU) jong ka Bethany Outreach Hospital.
Kat kum kane ka shithi ujor, kine ki Khynnah skul ka JNV kila pyntip ba ki bor pyniaid ka skul kim shym la lah satia ban pynbiang ia ka umbam umdih kaba khuid bad ka rukom ai um ruh ka long kaba thurmur bha ha ka por.
Haba kren halor ka bam, kila pyntip ba ka jingbam ba ki ioh na ka skul ki dei da ki jhur kiba la pyut bad ka bam kaba la sma kata ruh kaba la shet khlem ih.
Kine ki Khynnah skul kila pyntip ruh ba ki dawai dashin kaba ki ioh na ka skul mynta ki dei kiba la kut ka por treikam ne Expired. Ki ong ba ka jingleh bein kaba khraw eh ka dei ia ki Khynnah Kynthei namar ka jingpynslem ban ai ia ki sanitary pad.
Ki khynnah kila kren ruh halor ka jingjaboh bad jingkhein sting ki bor pyniaid ban peit ia ka khuid ka suba ka skul haba kdew ia ka jaka leit shabar kiba la jot rathai khamtam ha ka hostel ki shynrang.
Ki khynnah kila kynnoh ruh ia ka jingleh shiliang khmat jong ki bor pyniaid hapdeng ki Kynthei bad ki Shynrang nalor kiwei kiwei kiwei ki jingduna.
Ki Khynnah kila pynpaw ba watla ki la ju ujor la bunsien ia kine kiei kiei baroh sha ki bor khmih khamtam sha u Principal hynrei kane ka jingud jong ki kam shem la poi shano shano ruh.
Ki pyntip ba dei halor kane ka jingleh mynthi ba ki khynnah ka skul kila phaikhmat sha ka seng Federation of Khasi Jaintia & Garo People (FKJGP) ba kan iarap lem.
Halor kane, ka FKJGP-NKHD bala ialam da u Information Secretary Bah Ricky Majaw bad u Education Secretary Bah Gabriel Sun, kila leit ban jurip ia kane ka shlem jingstad ban iohi dala ki jong ki khmat ia ki jingeh jong ki Khynnah kiba pule ha kane ka jaka pule ka Sorkar.
“Ngi la iohi dala ki jong ki khmat ia ki jingeh ki Khynnah ka skul JNV. Ngi dap da ka mynsiem ba sngewkhia namar ka jinglap jong ngi khamtam haba phai sha ki jaka jong ki khynnah, ka umbam umdih, ka jaka leit bar, jaka sum, ka jaka bret jakhlia bad kiwei kiwei” ong kine ki Nongialam.
Halor kine ki jingeh, ka Seng kala dawa ia ki bor khmih ka skul JNV ba kin shimkhia mardor ha kaban weng noh ia kine ki jingeh ki khynnah khnang ba kan nym ktah ia ka lawei jong ki khynnah.
Kila pyntip ruh ba shen ka seng kan sa leit ujor sha u Deputy Commissioner ka Ri-Bhoi District halor kine ki jinglong jingman ha kane ka skulk a Sorkar Pdeng.
