Shillong, Lber 20: U General Secretary ka United Democratic Party (UDP) bah Jemino Mawthoh ula kam ba ka jingshah rem noh ka Party ha kane ka ilekshon MLA ba dang shu dep, ka lah ban dei namar ka jingpyrshah sorkar Meghalaya Democratic Alliance (MDA) ki paidbah ka jylla.
Haba kren sha ki lad pathai khubor u bah Jemino ula ong ba ha ki ilekshon ki don shi bun ki daw ba pynlong iaka Party ne iaki kyrtong ban rem noh hynrei ka jingjop tang 11 ngut ki MLA ka UDP ha kane ka ilekshon ba dang shu dep ka lah ban dei namar ka jingsngew pyrshah ki paidbah iaka MDA.
U bah Jemino ula pynpaw ba ka Party ka sngew ba ka lah lehbha ha kane ka ilekshon kaba dang shu dep namar haba nujor bad u snem 2018 ka Party ka jop tang 6 ngut ki MLA hynrei mynta ka kynti kala jop haduh 11 ngut ki MLA.
“Haka jingshisha ka UDP kala kyrmen ban jop haduh 17-19 ngut ki MLA napoh ka rilum Khasi-Jaintia hynrei ka jop pat tang 11 ngut bad kawei ka daw ba ka seng kam shym la lah ban poi sha ka thong ka lah ban dei na ka jingsngew pyrshah MDA” ong u bah Jemino.
U bah Jemino ula ong ba ka UDP kan iatrei shitom ban pynkhreh na ka bynta ka ilekshon ha Sohïong konstitwensi bad haka 25 tarik mynta u bnai, kan sa pynbna iala u kyrtong ha ka jingialang ka ban long hi ha Sohiong.
Ula ong ba ka seng kan dang trei shitom ban pynthikna ïa ka jingjop ha ka ilekshon MDC bad MP sha Lok Sabha ka ban long ha u snem 2024.
Pule lang ia kane: Pyn-im ka UDP ia ka jingsngew ba donkam ban iatylli noh ki Seng Riewlum ka Jylla
