Ka NPP kan nym ailad bad kan ieng ban iada ia ka Jylla
Shillong, K’llyngkot 30 : Ka National People’s Party (NPP) kala ther tyngeh ia ka All India Trinamool Congress (TMC) bad ong ba kan ieng ban iada ia ka Meghalaya na ka jingthmu ba sniew jong kane ka Party na West Bengal ban pynshlei da ki “Mynder” na Bangladesh hapoh ka Jylla.
Ka AITC kala iaid ban ialap elekshon ha kylleng ki jaka jong ka Jylla bad kynthoh jur ia ka NPP da ka slogan “Save Meghalaya” ne ban “pyllait ia ka Jylla naka jingsynshar bym hok” jong ka NPP bad ki paralok.
U Nongaiktien ka NPP Bah Bajop Pyngrope ha ka sngi U Blei ula ong “Ngin pynthikna ba ngin iada ia ka Meghalaya na ka jingwan rung kyrthep ki mynder, ban ai jingiada ia ka Meghalaya na ki Bangladesh ki ban wanrah da ka AITC ha Meghalaya”.
Ula ong ba ka AITC kam dei satia ka party kaba don hakhmat eh ha ka jingiakhun bad ka NPP namar kane ka party kam don satia ia ka nongrim ha Meghalaya.
“Ha Ri-lum Garo, ngi hap ban iakhun na bun ki liang bad ka TMC kam dei satia kaba hakhmat eh. Ngi hap iakhun pyrshah ia ka Congress kaba dang don ia ka vote bank lem bad kiwei ki party” ong u Bah Bajop.
Ha kawei ka liang, ka TMC hapoh ka jingialam u Dr Mukul Sangma ka ngeit ba ka dei kaba hakhmat eh ban iakhun ha kane ka elekshon ha Jylla. Kane ka party kala pynmih ia shibun ki jingkynnoh pyrshah ia ka NPP ban pynbiej ia ki nongthep vote ha kane ka elekshon.
Ka Elekshon ha Meghalaya kan long ha ka 27 tarik u Rymphang bad ia ka result yn sa pynbna ha ka 2 tarik u Lber.
