Shillong, Jylliew 23: Ka Meghalaya Pradesh Youth Congress (MPYC) hynne ka sngi palei kala kynnoh ba ka Sorkar NDA ba ialam da ka BJP, kala pyrshang ban leh politics ha ka kam shipai lyngba ka jingwanrah ia ka skhim Agneepath.
“Ngi na ka Indian Youth Congress, ngi pynrem jur ia ka rukom wanrah ia kane ka skhim khlem da pyrkhat lem ia ka jingud jingnam jong ki samla ba wad kam shipai, ia kaba la jingtrei shitom jong ki, la shu pynlong kam kai noh da ki bor ba dei khmih kiba pyrshang ban pynlong kam politics ia ka kam shipai ha ka Ri” ong u samla Banphira Lang Basaiawmoit, Vice President ka MPYC ha ka kyrwoh.
“Ngi ieng ha syndah bad ki samla lem bad ki paidbah ban pyni ia ka jingiadonlang ha kum kane ka khep kaba huri hura na ka jingleh jong ka Sorkar Pdeng” ula ong.
Une u Nongialam ka MPYC ula ong ba ka skhim Agneepath kam dei kaei kaei ruh hynrei ka dei tang ka sienjam bala shim da ka Sorkar ban weng shipor ia ka jingeh ha ka jingbym iohkam iohkam jong ki samla hapoh ka Ri.
“Kane ka skhim ka dei kaba la shu wanrah jubor sha ki samla ka Ri khlem da niewkor ia ka jingdon jong kiwei pat ki samla wad kam shipai kiba la pyndep ia ki eksam bad ki pre-medical test kiba donkam kat kum ki kyndon thungkam ha ki kam shipai” ula ong.
Une u Samla ula ong ba ha Jylla Meghalaya ruh, ki don bun bah ki samla bala pyndep ia ki test bapher bapher ban ioh rung kam shipai hynrei kane ka jingtrei shitom jong ki kala shu sepei kai khlem kano kano ka jingleh jong ki bad ia baroh la shu pynduh pyndam ban plie lynti ia kane ka skhim ka ban ktah jur ia ka jingim jong ka lashai ka lashisngi jong ki samla.
“Ka skhim Agneepath kala pyni shai ba kan long u shiah uba thar ia ka jingangnud bad jingphohsniew jong baroh ki samla ka Ri kiba kwah ban shakri ia ka Ri da kaba rung kam shipai” ula ong.
Haba pynpaw ba ki samla kiba shah jied ha ka skhim Agneepath yn ithuh ia ki kum ki Agniveer, u samla Basaiawmoit ula ong “Ka kam contract ba tang 4 snem ka pynmih ia bun ki dak jingkylli ban ia ka jubab. kaei ka ban jia ia kiba bun ki Agniveers hadien ka jingshakri ba 4 snem. La shu pynbor ia ki samla ban shongthait”.
Kane ka skhim kam pynthikna satia ia kino kino ki jingmyntoi ne ki jingkular ia ki samla hadien ka 4 snem ba ki pyndep ia ka jingshakri kum ki shipai, ula ong.
