Shillong, Jylliew 23: U MDC ka NPP na Rambrai-Jyrngam Constituency Bah Bajop Pyngrope hynne ka sngi palei, ula pynpaw ba u kloi ban iehnohkam kum u MDC ka KHADC lada don ba lah ban pynshisha baka Sorkar Jylla kala die ia ka khyndew ka shyiap jong ki paid riewlum ka Jylla sha Assam.
“Lada ki (ki briew ba sei ia ki jingkynnoh) lah ban sei ia ka sakhi baka don ka jingiadie iathied ba T. 20,000 klur, ngan iehnohkam kum u MDC” ong u Bah Bajop haba iakren bad ki nongthoh khubor.
Une u MDC ula ai jingmut ruh ia ki Hima ba kin husiar bha na kum kine ki briew kiba kynnoh baka Sorkar Jylla kala die ia ki khyndew ki shyiap jong ki khlem kano kano ka sakhi lane ka jingpynshisha.
U Bah Bajop ula ong ba ki briew ki dei ban kiar na ki jingkynnoh khlem nongrim namar ka Sorkar Meghalaya bad sorkar Assam kila trei shitom ha kaban lah pynbeit noh ia ki jingiakajia pud bala sah teng hapdeng ki ar jylla.
“Ngi kwah ia ka jingsuk ha ki jaka khappud bad ka por kala dei ban leh noh mynta hadien 50 snem” ula ong haba ban jur ba ki paidbah ki dei ban kyrshan ia ka Sorkar ha ka jingpyrshang jong ka ban lah pynkut noh ia ki jingiakajia baroh.
Une u MDC ula kyntu ruh ia ki briew kiba smat ban sei ia ki jingkynnoh ba ki dei ban leit iuhkjat sha ki jaka khappud bad ban tip ia ki jingshisha bad ki jingsngew jong ki briew ba sah ha kine ki jaka ha ka jaka ba kin lapmiet ka kynthoh ia kane ka kam tang na Nongbah Shillong.
