Tura, Naiwieng 02 : Kawei ka Kynthei na ka shnong Mandagre kaba hap hapoh ka Selsella Police Outpost, West Garo Hills, kala kynnoh ia uwei u bar jylla ba ula rahbor, leh beijot bad pynbor ia ka ba kan pynkylla niam.
Ha ka ejahar bala aiti sha u Officer-in-charge ka Selsella Police Outpost, kane ka briew (bala buhrieh kyrteng) kala kynnoh ba kane ka jingjia ia ka, kala jia ha ka 19 tarik Nohprah 2024, ha ka por ba ka leit sha Iew Rajabala ban phah shna ia ka mobile phone. Ka dei hangne ba kala iakynduh ia u Rafiqul Islam, ia uba ka kam, ba ula pyndik ia ka manka por lyngba ka phone call bad jingbyrngem.
“Nga la ioh pdiang ia shibun ki phone call na ki nombor bym tip, kiba dei jong u Rofiqul Islam uba dei na Rajabala, uba la pyndik ia nga man ka por da kaba phone ia nga na ki nombor bapher bapher hadien ba nga la block ia u” ong ka ejehar.
“Ula byrngem ban pyniap ia ki Kmie Kpa jong nga lada ngam kren ia u na phone. Namar ka jingtieng ia ka jingshngain ki Kmie Kpa, la pynbor ia nga ba ngan leh ia kaei kaba u bthah” kala bynrap.
Ka jinglong jingman kala nang heh ha ka 1 tarik Kyllalynglot, haba u Rifiqul ula pynbor ia ka ban iakynduh ha surok Mandagre. “Ynda nga por, u Rofiqul Islam ha ryngkat bad uwei u paralok, kila wan da kawei ka kali, kila patan ia nga na kti shapoh ka kali bad byrngem ban pyniap ia nga lada nga hylle” kala thoh.
Kane ka briew kala kam ba la ialam ia ka sha Rajabala ha kaba kala shah set jubab bad shah leh beijot. Kala kynnoh ruh ba u Rifuqul ula shoh ia ka man ka por ba ka pyrshang ban kren ia ki kmie kpa na phone lane pyrshang ban phet.
Kat kum ka ejahar, ha ka 6 tarik Kyllalyngkot, u Rafiqul ula ialam ia ka sha Mankachar, Assam bad “ula pynkylla niam ia ka na ka niam Khristan sha ka Islam, bad pynkylla ia ka kyrteng jong ka bad pynbor ruh ban iathoh ha Iingkashari ha Iingkashari Hat Singimari (Assam) khlem ka mon jong nga, Haba kyntait, ula shoh ia nga”.
Hadien ka jingshah set haduh shitaiew, la wan ialam biang ia ka sha Rajabala. “U Rafiqul ula iai bteng ban khang ia nga ba ngan kren ia ki bahaiing lane leit mih shabar” kala ong. Ha u Nailar, hadien ka jingjia bom shnong ha Rajabala ba donkti lang u Rofiqul, kala ioh pher bad leit ujor ha Tura Women Police Station hynrei ka ong ba “la pynbor ia nga ban weng noh ia ka jingujor namar ka jingbyrngem ban pyniap ia nga bad ia ki bahaiing lada u shah kem”.
Wat hadien ba leit phai shala iing, ka jingbyrngem ka dang iai bteng. Ka pyntip ba ha u Risaw 2025, ula rahbor ia u para jong ka na Iew Rajabala bad pyndonkam ia u ba un pynbor ba kan wan phai.
Ka iathuh ba dei ha ka 22 tarik Risaw, kala ioh ban phet biang bad ong “Nga lah rai ba ngan nym pyndem shuh ialade ha kine ki jingpyntieng pynsmiej. Nga la mad palat pud ia ki jingshah pynsajia, shah leh beijot bad shah set beain, rahbor bad pynkylla niam” kala ong.
Kane ka briew kala ujor ia ka ejahar ha ka 1 tarik Naiwieng ha Selsella Police Outpost, kaba hap ha West Garo Hills District.
