Kynnoh ka KHNAM ba dei ka jingthmu tih Uranium na Meghalaya ba pynmih OM ka MoEFCC

Shillong Nailur 22: U Working President ka Khun Hynniewtrep National Awakening Movement (KHNAM) Bah Thomas Passah ula ong ba ka rai jong ka Ministry of Environment, Forest and Climate Change’s (MoEFCC) ban pynmih ia ka Office Memorandum (OM) ban pyllait ia ka jingiasyllok bad ki paidbah bad ka Hearing na ka bynta ki projek tih marpoh khyndew kiba kynthup ia ki Atomic Minerals kum u Uranium ka dei ka jingpyrshang kaba shai kdar ban tih jubor ia u Uranium ha Meghalaya, da kaba kyntait ia ka jingpynsngew jong ki trai ri trai muluk.

Ha ka kyrwoh kaba la pyllait hynne ka Sngi Nyngkong, u Bah Passah ula ong ba ka ishu jong ka jingtih Uranium ha Meghalaya kadei kaba sngewkhia jur ha kaba bun ki sengbhalang bad ki nongshong shnong ki pyrshah jur namar ba ki sngewkhia ia ka jingktah jur ia ka mariang bad ia ka koit ka khiah jong ki paidbah.

Katkum ka jingong ka jongu, ki trai ri trai muluk ki ieng tylli ryngkat bad ki sengbhalang ban pyrshah ia ka jingtih Uranium kaba la kam sha ka jingshah khang khyrdep ka ophis jongka Uranium Corporation of India Limited (UCIL) hapoh ka jylla.

U Bah Passah ula ong kiba bun hi ki paidbah ka jylla Meghalaya ki sngewthuh shai ia ka jingma kaba khraw lada tih ia u Uranium bad kumta kila pyrshah jur.

Ula kyntu ban pynmih ia ka sur kaba khlain pyrshah ia kano kano ka jingpyrshang ban tih ia u Uranium hapoh ka jylla bad ka kyntu ia ka jingdonkam ka sorkar jylla ban shim mardor ia ki sienjam halor katei ka bynta.

U Working President ula kdew ruh ba u Myntri Rangbah ka Tamil Nadu ula phah da ka shithi sha u Myntri Rangbahduh ka ri ban pynkylla noh ia katei ka Office Memorandum kaba la pynmih da ka MoEFCC.

“Ngi khmih lynti ba ka sorkar Meghalaya kan bud ia katei ka juh ka nuksa bad ban shim lang ia kajuh ka nongrim ban pyrshah ia ka jingtih uranium hapoh ka jylla,” ula ong.