Shillong, Naitung 27 : Ka Khun Hynniewtrep National Awakening Movement (KHNAM) kala kynnoh ba ka Khasi Hills Autonomous District Council (KHADC) kala aiwai haduh 11 tylli ki check gate khlem da khot tender.
Kane ka jingkynnoh kala mih hadien ka jinglap lyngba ka RTI haba dawa ruh ia ka Council ban pyndam noh ia baroh ki work order bala ai jong kine ki check gate bad ban khot tender da kaba thymmai ban long kaba shai.
Ha ka shithi bala ai sha u Chief Executive Member / Executive Member ka tnad Trade, ka KHADC ha ka sngi Nyngkong, u Working President ka KHNAM Bah Thomas Passah ula kynnoh ba ka Council kala aiwai ia kine ki check gate sha ki riew shimet khlem da khot tender.
Haba sot ia ka jingshem na ka RTI, u Bah Thomas u iathuh ba ha u snem 2025, ka Tnad Trade kala aiwai ia 10 tylli ki check gate khlem da khot tender. Ka Council ha kane ka por kala aiwai ia ka jinglyngkot ka por kum ka daw.
Hynrei, ha ka RTI bala pan ha u Naitung 2026, ka pyni ba haduh 11 tylli ki check gate la aiwai mynta lyngba ki work order bala ai hapdeng u bnai Risaw 2025 bad Jylliew 2026.
Kine ki check gate ki dei kiba don ha Mawshynrut, Bangli ha South West Khasi Hills, Borsora, Byrnihat, Mawiong Khri, Umiam, Athiabari ha West Khasi Hills, Baridua ha Ri-Bhoi, Majai, Mawryngkneng, bad Nongprut ha Nongstoin.
“Kaba sngewkhia ka long ba ha u 2026, sa kawei ka check gate la bynrap na ka 10 bala ai ha u snem 2025. Kaba sngewkhia shuh shuh ka long ba wat hadien shisien, ka KHADC kam shym la pynmih ia ka jingpynbna paidbah lane khot tender ban pyniaid ia kine ki check gate” ong ka shithi.
Ka KHNAM kala kynnoh ruh ba ka Council kala iai bteng ban ai kam contract, supply bad kam maramot sha ki riew shimet khlem da khot tender.
Kala pynrem ruh ia ka Executive Committee kaba rim namar ka jingaiti ia kum kine ki kam ha ka rukom kab thurmur wat hapdeng ki dorkhas ba man ka por.
Ka KHNAM kala dawa ba ka EC ka dei ban pyndam noh ia baroh ki work order ba mynta bad ban pynmih jingpynbna thymmai ba khot tnder ban pyniaid ia ki check gate bad kiwei ki kam contract.
Ka KHNAM ka bynrap ba ka kyrmen ba ka ktien bad ka kam jong kane ka EC ba mynta kan iaid ryngkat ryngkat khnang ban pynthikna iaka synshar khadar kaba shai hapoh ka Council.
