Shillong, Naitung 31 : Ka Jaintia Students Union (JSU) ha ka sngi Thohdieng kala kynnoh ba ki ‘runar’ bala wanrah da ka Shree Cement Ltd kila thombor ia ka ambulance bad khanglad ia ki briew ba kin leit iashimbynta ha ka public hearing jong ka kompani ban tih mawshun ha Lum Syrman.
Ha ka kyrwoh lyngba ka video, u Education Secretary ka JSU Bochery Mi Pohsnem ula kam ba ka kompani kala wanrah ia ki briew ba namar sha ka thain bad siew dor sngi ia ki hapdeng T.500 bad T.1000 ba kin wan sha ka jingialang.
“Kine ki briew kila rah da ki jri bad kiwei ki tiar pynmynsaw. Kila thombor ia ka ambulance jong ngi bad wat ia ki medical staff. Kane ka pyni ba kim don satia ia ka jingiatip lang para briew bad kim lah ban pyniapher hapdengka ambulance bad ka kali shimet” ong u samla Pohsnem.
Ula kynnoh ba kane ka jingthombor kala jia hapdeng ka por 11:30 mynmiet jong ka sngi Palei, haba ka ambulance ka JSU Central Body ka dang leit shaw ia ki briew ba mynsaw sha shnong Shnongrim hadien ka jingioh phone.
Ka JSU kala kam ruh ba kawei ka kynthei na shnong Shnongrim kala shah shoh bad shah pyn sangeh na ka jingleit pyrshah ia ka project ha kane ka hearing.
Ka Union ka ong ba ki dkhot, ha ryngkat ki trai shnong na Elaka Nongkhlieh bad ki nongmihkhmat ka KSU, JNC bad kiwei ki Seng, kila poi sha katei ka jaka ha ka janmiet sngi Palei hynrei la shem ba ki nongialam jong kiwei pat ki seng, kila shah bat ha ki Pulit khlem kano kano ka warrant ne shithi hajir.
Ha ka step sngi Thohdieng, u Pohsnem ula kynnoh ba ki dkhot ka KSU kila shah khang lynti ban rung sha ka jaka ba pynlong ia ka hearing namar ka jingdon jong ki briew ba don kynhun, kiba khang lynti.
“Kane kam dei ka public hearing. Ka dei ka hearing shimet bala pynlong hapoh ka jingiada jong ka kynhun. Ngi la ioh khubor ba ka hearing kala iaid beit khlem kano kano ka jingpyrshah, kabym shym dei satia kaba shisha” ula ong.
Une u nongialam ka JSU ula pynrem ruh ia u Symbud Myntri Rangbah ba khmih ia ka kam pohiing namar ka jingkular halor ka jinglong jingman ka suk ka sain.
“U ong ba ula bthah ia u DC bad SP ban pynthikna ba ki briew kin ioh iashimbynta. Kaei kaba ngi iohi mynta ka long da khongpong. Ngi pynrem ia kane ka jingkular bad dawa ba un hiar shuki” ula bynrap.
Une u nongialam ka JSU u iathuh ba ka seng kala iakren bad u DSP ka East Jaintia Hills hadien ka jingthombor bad kala record ruh ia ka jingiakren.
“Ngin sa ujor ia ka ejahar bad u SP ka East Jaintia Hills lashai ka sngi. Lada ym leh eiei, ngin sa leit sha ki bor ba halor bad war ban tied ia ka jingkhang ka Iingkashari Meghalaya High Court” ula ong.
 ha ka sngi Thohdieng kala kynnoh ba ki ‘runar’ bala wanrah da ka Shree Cement Ltd kila thombor ia ka ambulance bad khanglad ia ki briew ba kin leit iashimbynta ha ka public hearing jong ka kompani ban tih mawshun ha Lum Syrman.){kind=link}