Shillong, Jylliew 28 : Ka Hynniewtrep National Liberation Council (HNLC) ka la kynnoh ba ki pulit Meghalaya ki pyndonkam ia ki briew kiba lui lui kum ki “trophy” ban pynphriang ia ki khubor ba ialam bakla.
Ha ka kyrwoh, u General Secretary ka HNLC bah Sainkupar Nongtraw u la dawa na ki pulit ban sangeh noh ia kane ka jingleh da kaba kdew halor ka jingwan pyndem wait jong ki arngut ki ehrang ka HNLC dang shen kiba la kam ba ki la shah ialam bakla ha u Samuel Wahlang Pahsyntiew.
U Bah Nongtraw u la kynnoh ba ka jingtohkit jong ki pulit halor ka jingbthei IED ha u bnai Lber 2024 ha Them Mawlong ka dei ka drama bad ka lynti ba kut lad ban pyni ïa u soh, ym ban wad ïa ka jingshisha.
“Nyngkong, ki pulit ki la kem ïa u Tarzan Lymba, da kaba kynnoh ba u la pynbthei ia u bomb. Mynta, hadien ba arngut “ki ehrang kiba pyndem” ki la kdew kti shawei pat, ka jingkynnoh ka la kylla sha u Samuel Pahsyntiew. Kane ka jingkylla ktien ka pyni sha ka pyrthei ba ka jingtohkit ka dei tang ka drama, ka lynti ba kut lad ban pyni ia u soh, ym ban wad ia ka jingshisha” ula ong haba kynnoh “Kine ki jingkem be-aiñ bad ki jingkdew kti shawei ki pynshisha ïa kawei ka kam kaba khlem artatien: ka tnad syntat jong ki pulit Meghalaya ka la pulom ha ka jingtreikam,” u la ong.
U la bynrap, “Ha ka jaka ban kubur ia ki jingshisha bad ban leh eiei halor ki tyllong jong kane ka jingjia, kila tan ia ki riew paidbah ki bym don pop sha phatok bad ki pyndonkam ia ki kum ki trophy ban iaid paidbah hakhmat ki paidbah. Kane kam dei ei ei hynrei ka jingkem ban pyni ia ka jingjop (trophy) bad ka drama sain pyrthei, kaba la leh ban pyni ia ka jingmutdur jong ka jingjop.”
U nongialam ka HNLC u la pynpaw shuh shuh ba ki kam jong ki pulit ki long kum ka “jingpyntriem ba la kyrshan da ka Jylla” kaba thmu ban pynsngap jar ia ki nongialeh pyrshah bad ban pyndkoh ia ki jingialeh lyngba ki jingthok bad jingpynbor.
U la pynrem ia ki arngut ki ehrang pyndem wait kiba kam ba ki donkam ban trei, da kaba ong ba baroh ki hap ban trei bad noh synniang.
“Kine ki arngut (Dibarius Jyrwa (32) bad u Ridor Lyngdoh Nonglait (30), kiba la pyndem wait ki la aiti ïa ki shithi iehnoh kam la slem shwa ba kin phet noh ban wad jaka rieh hapoh ki skat jong ka Jylla. Mynta ki lynniar ba ki “donkam ban trei.” Baroh ki hap ban trei Wat lada phi sah hapoh ka tnum jong ki kmie ki kpa jong phi, la khmih lynti ba phin noh synñiang….ym don ki kmie ki kpa kiba ai bam ïa phi khlem jingsiew junom,” u la pynpaw.
 ka la kynnoh ba ki pulit Meghalaya ki pyndonkam ia ki briew kiba lui lui kum ki "trophy" ban pynphriang ia ki khubor ba ialam bakla.){kind=link}