Shillong, K’lyngkot 11 : Ka Nongaiktien ka All India Congress Committee (AICC) Wing Commander (retd) Anuma Acharya ha ka sngi Palei kala kynthoh ba ka BJP kala kop ban jop palat 400 seat ha ka elekshon Lok Sabha ban wan namar ki Tnad treikam ka laitluid kum ka Election Commission ka India (ECI), Enforcement Directorate (ED) bad ka Central Bureau of Investigation (CBI) kila kylla lut ki dkhot jong ka.
“Ka BJP kala kop namar ka ECI, ED, CBI kila kylla long ki dkhot jong ka BJP” kynnoh ka Acharya haba iakren bad ki lad pathai khubor.
Haba kynnoh ba baroh ki tnad treikamba laitluid kila shah ksih bad shah pyniaid, ka Acharya kala ong “Ka jingpyndonkam ia ka ED, CBI, IT pyrshah ia ka Liang Pyrshah bad ban weng be-ain ia ki Sorkar bala jied da u paidbah kala dei ka rukom”.
Haba kylli kaei ka sienjam ba ka Congress kan leh ha kaban pyllait ia kine ki tnad na ka jingshah pyniaid ha ka kam sain pyrthei, kane ka nongaiktien ka AICC kala ong “Ki paidbah ki dei ban kyndit bynriew, ki paidbah ki dei ban ieng rasong bad kin sa lah ban jied ia ka Sorkar ba synshar u paidbah ia u paidbah. Ynda la wan kane ka Sorkar paidbah, baroh kila long biang kumba ju long”.
Kane ka Heh AICC kala wan ha Shillong ban pynbna ia ka Bharay Jodo Nyay Yatra ba ialam da u President barim u Rahul Gandhi, kaban sdang na Manipur. Kane ka yatra (rally) ba 66 sngi kan long haduh 6700 kilometer bad kan iaid lyngba ki 110 tylli ki district hashuwa ban pynkut ia ka ha Mumbai ha ka 30 tarik Lber.
Kala ong ba ha ki 10 snem ka jingbym bishar/leh hok da ka Sorkar BJP kala ktah jur bha ia ki paidbah, ia ka riti synshar paidbah bad ia ka riti synshar ka ri.
Halor ka jingkylli la kane ka yatra kan don jingktah ia ka elekshon Lok Sabha ban wan, ka Acharya kala ong “Khlem pep kan don jingktah hynrei ngan ym kynthoh eiei la kan pynkylla sha ki vote, ngim tip hynrei dei ban don mano mano ki ban lamkhmat ha ka jingiakhun, ka jingiakhun na ka bynta ka riti synshar paidbah, ka jingiakhun ban iada ia ka riti synshar ka ri, kaba la pyntroin da ka BJP.
