Shillong, Rymphang 23: Ka nongaitien ka All India National Congress (AICC) ka Dr. Shama Mohamed hynne ka sngi Palei kala kynnoh baka Bharatiya Janata Party (BJP) ka dei ka jingma iaki paid riewngeit Kristan bad iaka snap kyrpang ki riewlum lane ki Schedule Tribe (ST) kiba dei ki paid nong shong shnong ka jylla Meghalaya.
Haba kren sha ki lad pathai khubor ka Shama kala kam ba dang shen ka seng Janajati Dharma Sanskriti Suraksha Manch kaba dei ruh ka seng bala ithuh daka seng Rashtriya Swayamsevak Sangh (RSS), kala dawa ban pyndam noh iaka jingithuh Scheduled Tribe (ST) ia ki briew kiba la kylla sha ka niam Kristan.
Ka Shama kala ong ba kane ka jingdawa ka long pyrshah bad kaba ibein iaki rit paid bad iaka jingling kyrpang ki riewlum ka thain Shathei Lam Mihngi (North East) khamtam napoh ka jylla Meghalaya bad Nagaland.
“Kane ka paw shai ba ka BJP ka kwah ban pyntreikam iaka ain ba long pyrshah iaki riewlum bad iaki riewngeit Kristan bad dei namar kane, ka BJP kadei ban jubab la kan pyntreikam ne em ia kane ka juh ka buit lada ka wan haka bor hadien kane ka elekshon” la buh jingkylli ka Shama.
Ka Shama kala kynnoh ruh ba ka sorkar BJP ka don jingthmu ban pyntreikam iaka ain Uniform Civil Code (UCC) ha baroh kawei ka ri India bad kane ruh ka paw shai ba ka kwah ban iuhroit iaki rit paid bad kane ka buh ruh ia ka jingma ia baroh ki riewlum (ST) ha baroh kawei ka thain Shatei Lam Mihngi khamtam hapoh ka jylla Meghalaya.
Ka Shama kala kynnoh ruh ba ki briew kila shah thombor tang naka daw ba ki shah kynnoh bam doh masi lane kit iaki masi bad ia kine ki jingjia la sakhi na ka por sha ka por naduh ba synshar ka BJP.
Shuh shuh kala buh jingkylli ba ka BJP kadei ban kren shai iaka nongrim ba ka don haba iadei bad ka jingpyrshah bam doh masi ha kiwei ki jylla katba ha Meghalaya bad Mizoram pat ki kren ba kim pyrshah kum ia kine baroh.
Kane ka nongialam ka Congress kala kam ba ka Congress kadei ka Party kaba synshar laitluid bad kadei ka party kaba burom ia baroh khamtam iaka jinglong kyrpang ki rit paid hapoh ka thain Shatei Lam Mihngi bad ka jylla Meghalaya.
Haba kynnoh iaka BJP ka don jingthmu ban pyndam iaka khyrnit ba hynriew jong ka riti synshar ka ri India (Sixth Schedule) lyngba ka 125th Constitution Amendment Bill 2021.
Kala ong ba ka sorkar Mizoram ba ialam daka seng Mizo National kala pyrshah ia kane watla ka BJP ka don lang ha ka sorkar.
“Iaka khyrnit ba hynriew jong ka riti synshar ka ri India (Sixth Schedule) la wanrah daka sorkar Congress ha Meghalaya kum shi bynta ban ai jingithuh kyrpang bad ban iada iaki rit paid riewlum ka jylla namar ka Congress ka burom lut ia baroh salonsar” la ong ka Shama.
