Shillong, Nohprah 30: Ka BJP Mahila Morcha bad ka BJYM hynne ka sngi Saitjaiñ kala rakhe kynmaw burom ia ka lyngkhuh sngi ïap kaba 161 jong u Khla wait ka ri u Kiang Nangbah uba long u nongiakhun ban pynioh ia ka jinglaitluid iaka ri.
Ki nongialam ka BJP kila buh syntiew ha u mot sahnam jong une u khla wait uba don ha State Central Library kum ka dak jong ka jingburom ia ka mynsiem len lade jong une u riewhraw ka ri.
Ka President jongka Meghalaya BJP Mahila Morcha, Kong Sukhi Pariat kala ong, “Ngi kyntu ia ka sorkar ba kan pynleit jingmut halor kiba bun ki jingeh kiba mad da ki longkmie kiba kamai pyndap marwei ia ka iing ka sem. Ki kmie ki pynheh pynsan ia ka imlang sahlang bad kumta dei ban pynbiang bad ban ai ka jingkyrshan ia ki ban pynthikna ba ngin pynmih ia ka pateng kaban ai jingshngain ia ka imlang sahlang”.
“Ka jingeh na ka jingkynrei u Droks hapdeng ki samla ka la jur bha hapoh ka jylla mynta kumta baroh ki kynhun kiba don ha ka imlang sahlang kidei ban iatrei ryngkat ban pynthikna ba ki samla kin lait na ka jingshah pynbeij ha ka jingdih droks bad ban wanrah biang ia ki sha ka jingim kaba bha bad kaba koit ba khiah. Ka sorkar kadei ban phaikhmat ruh ban kyntiew ia ki longing kiba duk” ong ka Kong Pariat.
Hadien kane ka prokram ha State Central Library, katei ka kynhun kala leit sha Motphran kala leh kynmaw burom ia u Kiang Nongbah da kaba buh ia ki khiew syntiew.
Ka Kong Pariat kala ong, ba u mot sahnam ha Motphran udei uba pynsah jingkynmaw ia ki Khasi kiba la leit iashimbynta ha ka Thma Bah kaba nyngkong ha ri France bad kala kyntu ia ki paidbah ba kin pynlong ia u Motphran uba khuid bad uba itynnad kum ka dak jong ka jing burom bad ym dei ban tah ia ki ‘poster’ ha une u Mot sahnam.
