Ai jingkyrshan sa ka HSPDP bad MLA shimet
Shillong, Lber 03 : Ka National People’s Party (NPP) kala pynkhreh mynta ban wanphai biang ha ka bor synshar hapoh ka Jyla hadien ka jingkynjoh ia u nombor ba ka donkam ban ioh thaw ia ka Sorkar ba thymmai ha Jylla.
Hynne ka sngi thohdieng, kala ioh sa ia ka jingkyrshan jong ki arngut ki MLA ka Hill State People Democratic Party (HSPDP) bad u MLA shimet ka Rambrai-Jyrngam, ban thaw ia ka Sorkar ba thymmai hapoh ka Jylla.
Ka NPP kala kynjoh mynta ia ka 32 ngut ki MLA, kaba la urlong da ka jingwan ai jingkyrshan sa ki arngut ki MLA ka HSPDP bad u MLA shimet ka Rambrai-Jyrngam hynne ka sngi thohdieng.
Kine ki arngut ki MLA-Methodius Dkhar MLA ka Mawshynrut bad Shakliar Warjri MLA ka Mawthadraishan, kila aiti da ka shithi ai jingkyrshan ha u National President ka NPP Conrad K Sangma ha ka jingiadonlang u ma Sniawbhalang Dhar.
U MLA shimet ka Rambrai-Jyrngam RG Momin, ula rai ban leit iatreilang bad ai da ka shithi ai jingkyrshan sha ka NPP ban iathaw ia ka Sorkar hapoh ka Jylla.
Ka NPP kaba don 26 ngut ki MLA lajong, kala ioh ia ka jingkyrshan na ka BJP kaba don 2 ngut ki MLA, ka HSPDP-2 bad ki MLA shimet-2 ngut.
Hynne ka step, u Conrad ula leit iakynduh ia u Lat ka Jylla Phagu Chauhan ha Raj Bhavan, ban aiti ia ka shithi iehnohkam kum u Myntri Rangbah jong ka sorkar bala leit noh bad ha kajuh ka por ban kam ia ka jingbun paid ha kaban thaw ia ka Sorkar ba thymmai.
Ha kane ka por, ka kynhun ka dang don tang 29 ngut ki MLA – 26 ngut na ka NPP, 2 ngut na ka BJP bad u MLA shimet ka Baghmara u Kartush R Marak.
U Lat ka Jylla ula khot nyngkong ia u Conrad ban thaw ia ka Sorkar bad ula pan ia ka shithi ai jingkyrshan hashuwa ka janmiet sngi thohdieng. Da ka jingwan kyrshan ka HSPDP bad u MLA shimet na Rambrai-Jyrngam, ka kynhun synrop kala don mynta haduh 32 ngut ki MLA.
Ka NPP ka donkam tang 30 ngut ki MLA ha ka Iingdorbar ba 59 ngut ki MLA ban ioh thaw ia ka Sorkar, bad 31 ngut ki MA hadien ka elekshon jong ka Sohiong constituency, ka ban kyntiew ia ka jingdon ki MLA hapoh Assembly sha ka 60 ngut.
Lah ban kdew hangne, ba u Conrad un bam smai biang ha ka sien kaba ar kum u Myntri Rangbah ka Jylla ha ka 7 tarik Lber, 2023 bad ha kane ka sngi yn pynbam snai ruh ia ka kynhun ki Myntri Sorkar.
Lah ioh khubor ba u Myntri Rangbah Duh ka Ri Narendra Modi bad u Myntri kam Pohiing Amit Shah, kin wan ban iadonlang ha kane ka jingialang bam smai ha Shillong.
