Shillong Nohprah 16: Ka North Eastern Council (NEC) kala kynjoh sha ka jingdap 50 snem ha ka jingai jingshakri ia ki paidbah ka thain Shatei Lam Mihngi ka Ri.
Iaka NEC la seng lyngba ka Act jong ka ïing dorbar thawaiñ Parliament ha u snem 1971 bad la plié paidbah iaka ha ka 7 tarik u Naiwieng, 1972 ha nongbah Shillong bad kala dap 50 snem ha u Naiwieng 2022.
Ha ka jingialang Plenary kaba 70 ha nongbah Guwahati, kaba la long ha u Risaw 2022 hapoh ka jingpyniaid u Myntri Kam Pohiing bad shongknor ka NEC, la rai ban rakhe kyrpang ia kane ka jingdap 50 snem ka NEC bad la rai ba iaka jingrakhe Golden Jubilee yn pynlong ha nongbah Shillong ha ka 18 tarik u Nohprah 2022 ha kaba yn don ka jingialang jong ka NEC bad ruh ka jingialang paidbah.
Ia ka jingialang ka NEC yn pynlong ha ka State Convention Centre Auditorium, ka jingialang paidbah pat kan long ha madan Polo, Shillong.
U Myntri Rangbahduh ka ri u Narendra Modi un wan iashim bynta ha kine artylli ki jingialang ha ryngkat baroh ki dkhot ka NEC kiba kynthup ia u Myntri ka tnat Kam Pohiing, ki Myntri DoNER, ki Lat bad ki Myntri Rangbah jong ki jylla ka thain shatei lammihngi, ki myntri ka Sorkar Pdeng kiba dei na ka thaiñ shatei lammihngi, ki MP, ki MLA bad ki dkhot ka NEC.
Nalor kane, la khot sngewbha ruh ia ki Chief Secretary jongki jylla, ki Secretary jong ki tnat ka Sorkar Pdeng, ki ophisar na ki jylla ka thaiñ shatei lammihngi bad kiwei kiwei.
Na ka bynta ka jingialang paidbah, ha ryngkat ki paidbah, ki riewmihkhmat, kito kiba trei bha ha ki kam bapher bapher, ki nongmihkhmat na ki Self Help Group, ki kynhun jong ki nongrep na baroh phra tylli ki jylla ka thaiñ kin wan iashim bynta bad la antad ba yn don kumba 10,000 ngut ki briew ki ban wan iashimbynta ha kane ka jingialang paidbah.
Ha kane ka sngi, u Myntri Rangbahduh yn plié paidbah ia katto katne ki projek kiba kongsan ha ka thaiñ kiba kynthup ia ka Indian Institute of Management (IIM), Shillong, yn aiti iaki Tower 4G ha Meghalaya, un plié paidbah ia ki projek NEC bad ki projek ka jylla Meghalaya bad yn buh mawnongrim ruh ia katto katne ki projek.
U Modi yn pyllait paidbah ruh ia ka ‘Golden Footprints’, ka kot kaba pyni ia ki jingtrei ka NEC na ka bynta ka roi ka par ha ka thaiñ shatei lammihngi ha kine ki 50 snem bala dep ha kane ka jingrakhe ia ka Golden Jubilee.
Ki jingthoh ha kane ka kot kidei kiba la ioh na ki jingtip kiba don ha ka Council bad na ki jingtip kiba don bad ki phra tylli ki jylla jong ka Council bad ka don ruh ia ki dur jong ki kam ka roi ka par bad ka jingwanrah ia ki jingdon jingem ha ka jingkyrshan jong ka NEC ha kine ki por ba la dep.
